لاہور۔30 مئی (اے پی پی )وفاقی وزیر ریلوے شیخ رشید احمد آکھیے جو آندے ترائے مہینے پاکستان دی سیاست سمیت ہر حوالے نال وڈے اہم ہن ، ایجھا نی تھی سگدا جو کھنڈ انکوائری اچ اساڈے دور دی سبسڈی دا کیس چھوڑ ڈتا ونجے بلکہ گزریل دور دی 22ارب دی سبسڈی وانگوں اساڈی حکومت دی 3 ارب دی سبسڈی دا کیس وی اگوں ودھسی ۔ وزیراعظم عمران خان چور ،ڈکیتاں ، تے ملک دا خون پیونڑ آلیں دے خلاف احتساب دے بیانیے تے عمل تھی تے رہسی ،چوہدری برادران وڈے سمجھدار سیاستدان ہن، عمران خان دی حکومت کتھائیں کائنی ویندی پئی ، راجہ ظفر الحق، گوہر ایوب اتے میڈے علاوہ نواز شریف سمیت پوری کابینہ ایٹمی دھماکے کرنڑ دے خلاف ہئی ،مزید 5ریل گاڈیاں چلاونڑ دا فیصلہ کیتے ،60فیصد بکنگ دے نال ریل گاڈیاں چلاونڑ پاروں گزریل 10ڈینھ اچ 5کروڑ روپے دا ضیان تھئے ، ڈوجھے شہراں توں آونڑ آلے تاجراں دی مشکلات پاروں وزیراعلیٰ پنجاب توں ہفتے اچ ترائے دی بجائے ڈو ڈینھ کاروبار بند رکھنڑ دی درخواست کیتی اے ۔ ریلوے ہیڈ کوارٹرز اچ پریس کانفرنس کریندے ہوئیں شیخ رشید آکھیے جو میں چارے صوبیں دا مشکور آں جنہاں ریل گاڈی چلاونڑ اچ اساں نال تعاون کیتے ، ایں ویلھے 142اچوں صرف 40 ریل گاڈیاں چلیندے پیوں تے جڈاں تئیں کورونا دی وبا قابو اچ نئیں آندی مزید تعداد کائناں ودھائی ویسی ۔ مسافراں دی مشکلات کوں ڈیکھدے ہوئیں مزید پنج ریل گاڈیاں چلاونڑ دا فیصلہ کیتا گئے انہاں اچ سرسید، کراچی، شالیمار، بہاﺅ الدین ذکریا تے ریل کار شامل ہن۔
