ٹوکیو ۔ 17 مئی (اے پی پی) جاپانی ادارہ صحت ولوں جاری کیتی گئی ہک رپورٹ اچ ڈسایا گئے جو پوری دنیا اچ کورونا پاروں ہلاکتاں دی تعداد 3 لکھ 6 ہزار توں ودھ گئی اے جڈاں جو متاثرین دی تعداد 46 لکھ اے اتے وائرس کوں شکست ڈیونڑ آلیں دی تعداد وی 17 لکھ 40 ہزار تئیں پج گئی اے ۔چین اچ4 ہزار 633 لوک وائرس پاروں ہلاک تھئن تاں ایں ملک اچ 82 ہزار 933 لوکاں اچ ایں مرض دی نشاندہی تھئی اے ۔ ساوتھ چائنہ مارننگ پوسٹ دی خبر دے مطابق چینی قومی صحت کمیشن ولوں کل جاری کیتے گئی رپورٹ اچ واضح کیتا گئے جو روبہ صحت تھیونڑ آلے کجھ لوکاں اچ پھیپھڑیں اتے عارضہ قلب، پٹھیں اچ کمزوری توں حرکت کرنڑ اچ دشواری اتے نفسیاتی مسئلیں پاروں انہاں کوں علاج معالجہ دی ضرورت پیش آسگدی اے ۔ 6 ہزار 937 لوکاں دے ہلاک تھیونڑ آلے ملک ایران دے صدر حسن روحانی اعلان کیتے جو عیدا لفطر دے بعد پورے ملک اچ لاک ڈاﺅن کوں ختم کرڈتا ویسی ۔ انہاں ڈسائے جو ملک اچ وائرس دا خطرہ ٹلیا کائنی لیکن صورت حال بہتر اے ۔جاپان اچ ہلاکتاں دی تعداد 742 جڈاں جو مصدقہ مریضاں دی تعداد 16 ہزار 965 تھی گئی اے ۔ ٹوکیو دے گورنر یوریکو آکھیے جو حالات زندگی کوں معمول تے گھن آونڑ کیتے یومیہ نویں کیسسز دی تعداد 20 توں گھٹ تئیں تھیونڑ دا ہدف مقرر کیتا گئے ۔سعودی عرب اچ 292 لوک کورونا دا شکار بنڑین تاں مریضاں دی تعداد 50 ہزار دے نیڑے پج گئی اے ۔بھارت اچ وائرس دا گراف مسلسل اتے ویندا پئے عالمی سطح تے ہنڑ اے ایران دے نیڑے پجنڑ آلا اے ، 24 گھنٹے اچ ملک اچ مزید 104 لوکاں دی موت تھئی اے تاں مجموعی جانی ضیان ڈو ہزار 753جڈاں جو مصدقہ مریضاں دی تعداد 85 ہزار 784 تئیں پج گئی اے ۔متاثرین دی تعداد دے اعتبار نال روس اسپین دے بعد ڈوجھے نمبر تے ہے ایں ملک اچ 2 ہزار 418 موتاں تے ڈو لکھ 63 ہزار لوکاں اچ وائرس دی نشاندہی دی اطلاعات ہن ۔متحدہ عرب امارات اچ وائرس دے اثر اچ تیزی آئی اے تاں اتھاں 210 موتاں تھئن تے 22 ہزار لوک متاثر ہن ۔
