اسلام آباد ۔ 27 مئی (اے پی پی) وزیر خارجہ مخدوم شاہ محمود قریشی آکھیے جو دنیا بھارت دے عزائم دا نوٹس گھنے ، بھارت مقبوضہ کشمیر دی آئینی حیثیت دی تبدیلی، سٹیزن ترمیمی ایکٹ دے ذریعے اقلیتاں کوں نشانہ بنڑاونڑ تے ہمسایہ ملکاں نال سرحدی جھیڑے اچ الجھیا ہویا اے ، لداخ اچ چھیڑ چھاڑ دے بعد بھارت چین تے الزام لیند کھڑے ، چین ہمیشہ بردباری اتے تحمل دا مظاہرہ کیتے۔ بدھ کوں خطے دی صورت حال تے بیان اچ انہاں آکھیے جو دنیا کوں بھارت دے عزائم دا نوٹس گھننڑاں چاہیدے ، بھارت کیرھے پاسے ٹرپئے ؟۔ انہاں آکھیے جو بھارت کڈاہیں یکطرفہ غیر قانون اقدامات دے ذریعے مقبوضہ جموں تے کشمیر دے جھیڑے آلے علاقے کوں اپنڑے نال رلاونڑ دی کوشش کریندے تے کڈاہیں قوانین اچ ترمیم دے ذریعے مقبوضہ کشمیر اچ آبادیاتی تناسب کوں بدلنڑ دی کوشش کریندے ، بھارت کڈاہیں وی سٹیزن ترمیمی ایکٹ، این آر سی جیہوجے متنازعہ قوانین متعارف کرویندے جیںنال ہندوستاں دے اندروں آوازاں آونڑ شروع تھی ویندن ۔ وزیر خارجہ آکھیے جو بھارت کوں کڈاہیں نیپال توں مسئلہ تھی ویندے تے کڈاہیں افغان عمل اچ لت اڑیندے کڈاہیں اے بلوچستان اچ شورش کوں ہوا ڈیندے تے بھارت ہنڑ لداخ اچ وی اوہا حرکت کیتی اے تے ہتھوں چین تے الزام لاونڑ دی کوشش کریندا پئے ۔ وزیر خارجہ آکھیے جو چین حالی وی اکھیندا کھڑے جو مسئلہ گال بات دے ذریعے حل کریندوں لیکن اگر بھارت متنازعہ علاقے اچ تعمیرات دا سلسلہ جاری رکھیا تاں ولا خطے اچ امن تے استحکام کوں خطرہ تھی سگدے ۔
