اسلام آباد ۔ 29 جون (اے پی پی) وزیر خارجہ شاہ محمود قریشی پاکستان اسٹاک ایکسچینج تے تھیونڑ آلے دہشت گردانہ حملے دی مذمت کیتی اے ،سنوار کوں اپنڑے بیان اچ وزیر خارجہ آکھیے جو دشمن ہک واری ول اساڈی داخلی سلامتی تے حملہ آور تھیونڑ دی کوشش کیتی ، اساڈی مستعد فورسز وختی جیویں دہشت گرداں دے مکروہ عزائم کوں ناکام بنڑائے او قابل تحسین اے ۔ شاہ محمود قریشی آکھیے جو پولیس اتے قانون نافذ کرنڑ ّآلے اداریں دی وختی کاروائی دہشت گرداں دے مذموم عزائم کوں خاک اچ رلا ڈتے ۔ دہشت گردی دے عفریت کوں منڈھوں مکاونڑ کیتے پوری قوم ، مسلح افواج، پولیس اتے قانون نافذ کرنڑ آلے اداریں دے نال سیسہ پلائی دیوار وانگوں کھڑی اے ۔ وزیر خارجہ بزدلانہ حملے کوں ناکام بنڑاونڑ کیتے اپنڑیاں جاناں دا نذرانہ پیش کرنڑ آلے شہیداں کیتے دعا کیتی تے انہاں دے لواحقین نال اظہار ہمدردی کیتے۔ وزیر خارجہ زخمیاں دی وختی چنگی صحت کیتے وی دعا کیتی ۔