راولپنڈی ۔ 23 جون (اے پی پی) پاک فوج دے سربراہ جنرل قمر جاوید باجوہ نال پیپلز لبریشن آرمی (پی ایل اے )جنرل ہسپتال دے شعبہ آئی سی یو دے چیف میجر جنرل ڈاکٹر چاوفیہو دی سربراہی اچ ڈاہ رکنی میڈیکل ٹیم ملاقات کیتی جئیں اچ ، کوویڈ 19 دے خاتمے اتے جامع حکمت عملی بارے گالھ مہاڑ کیتی گئی ۔پاک فوج دے شعبہ تعلقات عامہ(آئی ایس پی آر) دے مطابق آرمی چیف جنرل قمر جاوید باجوہ فوری طور طبی سامان ڈیونڑ تے تعاون تے شکریہ ادا کیتا۔ چینی طبی ماہرین دے دورہ نال پاکستان توں وبائی امراض دا مقابلہ کرنڑ اچ مدد ملی اے۔ آرمی چیف جنرل قمر جاوید باجوہ آکھیا جو دنیا کوویڈ۔19 دے علاج معالجہ سانگے اجاں کوششاں کریندی پئی اے،ایں بیماری نال نبڑنڑ سانگے قومی کوششاں اتے اوندے معاشی اثرات کوں گھٹ کرنڑ سانگے عالمی تعاون بہوں ضروری اے۔چین دے معززین ایں بارے تعاون جاری رکھنڑ دا یقین ڈوایا۔
