مظفرگڑھ ۔ 25 جون (اے پی پی) مظفرگڑھ اچ ٹڈی دل دا تریجھی واری حملہ،بچی کچھی فصل وی تباہ،کسان پریشان تھی گئے ۔تفصیل دے مطابق مظفر گڑھ دے علاقے تے ٹڈی دل دے حملے وقفے وقفے نال جاری ہن اتے ہک ہک جاہ تے ترائے ترائے واری حملہ تھی چکیے ،گزریل ڈینھ مظفر گڑھ دی تحصیل جتوئی اتے بیٹ میر ھزار دے علاقیاں تے ٹڈی دل تریجھی واری حملہ کیتے اتے بچی کچھی فصل کوں وی چٹ کر ماریس۔ بیٹ میر ھزار دا علاقہ موضع بھنڈہ مہربان ٹڈی دل دے حملے توں بہوں متاثر تھیے۔مظفرگڑھ دی تحصیل علی پور اچ خیرپور سادات،سیت پور اتے ہیڈ پنجند دے علاقیاں اچ ٹڈی دل نال کپاہ،مکئی مونگ دی فصلاں اتے گھاہ اتے سبزیاں دا بہوں ضیان تھیے اتے کسان اپنڑی مدد آپ ٹڈیاں کوں بھجیندے رہین۔ اللہ ڈتہ،غلام رسول،فیض بخش،اللہ وسایا،خیر محمد اوتے بئے کساناں اپیل کیتی اے جو حکومت ٹڈی دل دے خاتمے سانگے موثراقدامات کرے۔
