باہرلے ملک اچ پتھے پاکستانیاں کوں واپس گھن آونڑ دا فیصلہ کیتے ، گلگت بلتستان اتے خیبر پختونخوا حکومتاں ایس او پیز دے نال سیاحت دا شعبہ کھولیسن ، اساں یورپ تے چین جیہے لاک ڈاﺅن دے متحمل نی تھی سگدے ، میں جیویں لاک ڈاﺅن چاہندا ہم اونویں کائنی تھیا ، ملک اچ 25فیصد لوک غربت توں تلے ہن ، کورونا وائرس دی صورتحال دے اثرات اساڈی معیشت تے پئن ، آندے ڈینھاں اچ کورنا مزید ودھنڑاں اے ،کورونا وائرس دے اثرات توں بچنڑ کیتے ایس او پیز تے احتیاطی تدابیر تے عمل کرنڑاں چاہیدے ، ویکسین دی تیاری تئیں اساکوں کرونا وائرس دے نال رہنڑاں پوسی
اسلام آباد۔یکم جون (اے پی پی) وزیراعظم عمران خان آکھیے جو باہرلے ملک اچ پتھے پاکستانیاں کوں واپس گھن آونڑ دا فیصلہ کیتے ، گلگت بلتستان اتے خیبر پختونخوا حکومتاں ایس او پیز دے نال سیاحت دا شعبہ کھولیسن ، اساں یورپ تے چین جیہے لاک ڈاﺅن دے متحمل نی تھی سگدے ، میں جیویں لاک ڈاﺅن چاہندا ہم اونویں کائنی تھیا ، ملک اچ 25فیصد لوک غربت توں تلے ہن ، کورونا وائرس دی صورتحال دے اثرات اساڈی معیشت تے پئن ، ٹیکس وصولی اچ 30 فیصد گھٹ تھئی اے، برآمدات اتے ترسیلات زر وی گھٹ تھی گئن ، سرمایہ کاری وی رک گئی اے ۔آندے ڈینھاں اچ کورنا مزید ودھنڑاں اے ،ہلاکتاں دا وی ڈر اے کورونا وائرس دے اثرات توں بچنڑ کیتے ایس او پیز تے احتیاطی تدابیر تے عمل کرنڑاں چاہیدے ، ویکسین دی تیاری تئیں اساکوں کرونا وائرس دے نال رہنڑاں پوسی ۔اے گال انہاں سنوار کوں قومی رابطہ کمیٹی دے اجلاس دے بعد صحافیاں نال گال مہاڑ کریندے ہوئیں آکھی اے ۔ وزیراعظم آکھیے جو نیشنل کمانڈ اینڈ آپریشن سینٹر اچ روزانہ اجلاس تھیندن ،کورونا دی پاکستان اچ موجودگی دے فوراً بعد این سی سی دا اجلاس سڈیا، پاکستان دے حالات چین اتے یورپ توں مختلف ہن۔پاکستان اچ 5کروڑ لوک غربت دے تلوں ہن ۔ وزیراعظم آکھیا جو انہاں لوکاں دے اہل خانہ کوں وی نال رلاﺅں تاں 12توں 15کروڑ بنڑ ویندن ، ڈھائی کروڑ لوک اینجھے ہن جیرھے خود نہ کماون تاں گھر اچ روٹی نی پک سگدی ۔ انہاں آکھیے جو اساڈی سوچ ہئی جو لاک ڈاﺅن اگر کیتا لوک کٹھے نہ تھئے تاں کورونا گھٹ کھنڈ سگدے ۔ پورا لاک ڈاﺅن ایندا علاج کائنی ، لوکاں دے جمع تھیونڑ پاروں اے کھنڈنڑاں اے ، سماجی فاصلہ برقرار رکھنڑ نال گھٹ تھی سگدے ۔ انہاں آکھیے جو امریکہ، یورپ اتے اٹلی اچ کورونا وائرس پاروں ڈاکٹراں تے نرساں تے دباﺅ ودھیے، لاک ڈاﺅن دا مقصد اے ہئی جو کورونا گھٹ توں گھٹ کھنڈے لیکن ڈیہاڑی دار دی وی اساکوں خیال ہئی جو انہاں دا کیا بنڑسی ۔ انہاں آکھیے جو ہک پاسے امیر لوک لاک ڈاﺅن کیتے شور مچیندے ہن تے ڈوجھے پاسے غریب طبقہ ہئی انہاں اچ چھابڑی آلے، ٹیکسی آلے اتے رکشہ ڈرائیور اتے دیہاڑی دار شامل ہن، اساں وائرس دے کھنڈنڑ کوں روکنڑ دے نال نال بھک افلاس کوں وی روکنڑاں ہئی ۔ وزیراعظم آکھیے جو ویکسین بنڑنڑ تئیں کورونا دا خاتمہ ممکن کائنی رہیا ، اساکوں کورونا دے نال ہی رہنڑاں ہوسی ۔کورونا وائرس توں متاثر غریب لوکاں تے معیشت کیتے 8ارب ڈالر دا پیکج ڈتے ۔ انہاں آکھیے جو اٹھارویں ترمیم دے بعد صوبے خود فیصلے کریندے ہن، ڈاکٹرز تے امیر طبقے دا موقف کجھ مختلف ہئی، غریب لوکاں دی آواز سامنڑے آندی پئی ہئی ، بدقسمتی نال جیویں لاک ڈاﺅن تھئے ایندے نال تلواں طبقے کوں ضیان تھئے اساں یونیورسٹیاں، سکول اتے شادی ہال بند کر ڈیندے لیکن کاروبار وی نہ روکیندے کیوں جو اساں صورت حال اچ توازن پیدا کرنڑاں ہئی ، امریکہ اچ ہک لکھ لوک کورونا پاروں مر گئن انہاں وی فیصلہ کیتے جو لاک ڈﺅن اگر ختم نہ کیتا تاں معیشت کوں ضیان تھیسی حالانکہ انہاں ترائے ہزار ارب ڈالر کورونا دے کھنڈنڑ کوں روکنڑ تے معیشت دے استحکام کیتے ڈتن ۔ وزیراعظم آکھیے جو آندے ڈینھاں کورونا مزید ودھنڑاں اے افسوس دے نال آکھنڑاں پوندے جو شرح اموات ودھ ویسن تاں جو عوام دی ذمے واری اے جو او احتیاط کرن اتے ایس او پیز تے عمل کرن اگر نہ کریسن تاں اپنڑاں ضیان تھیسی وائرس کھنڈ ویسی ایں سلسلے اچ ایس او پیز اساں ڈٰندے پیوں ہک نیگٹیو لسٹ وی بنڑائی اے جتھاں خطرہ اے اتھاں لاک ڈاﺅن کریسوں۔ وزیراعظم آکھیے جو سیاحت دے شعبے کوں ایں کیتے وی کھولنڑاں چاہیدے جو ایندے نال جڑیے لوکاں دی گرمیاں اچ ترائے چار مہینے آمدنی تھیندی اے اگر لاک ڈاﺅن اچ اے عرصہ لنگھ گئے تاں انہاں لوکاں دے سردیاں کیتے کجھ ہوسی ۔ گلگت بلتستان تے خیبرپختونخوا دیاں حکومتاں فیصلہ کیتے جو گلگت بلتستان اتے خیبر پختونخوا حکومتاں ایس او پیز بنڑا تے سیاحتی شعبہ کھولسین ۔ انہاں آکھیے اگر غربت توں بچنڑاں اے تاں کورونا وائرس کوں کھنڈنڑ توں روکنڑاں اے اساکوں ذمے وار قوم دے طور تے اپنڑاں فرض پورا کرنڑاں پوسی ، اینویں ہسپتالاں تے دباﺅ گھٹ تھیسی تے معاشرہ وی کرونا دے اثرات توں محفوظ رہ ویسی ۔ انہاں آکھیے جو بھارت وی سخت لاک ڈاﺅن کیتے غریباں کیتے مسئلے تھی گئن ، شرح اموات ودھ گئن ۔ اساں ڈاہ لکھ دی ٹائیگر فورس بنڑائی ایندا مقصد اے جو لوکاں اچ کورونا متعلق شعور ڈیون ۔ انہاں آکھیے جو ذیابیطس، بلند فشار خون آلے مریض اتے بزرگاں کوں کورونا توں ودھ خطرہ اے ۔ حالی وی شہراں اچ 50 فیصد توں ودھ وینٹی لیٹرز دستیاب ہن تے اساں تعداد ودھیندے پیوں ایں سلسلے اچ وینٹی لیٹرز دی تعداد وی ودھائی ویسی۔ وزیراعظم آکھیے جو ڈاکٹرزاتے طبی عملے کوں پیش مشکلات دا پورا احساس سے ،ڈاکٹرز اتے طبی عملے نال انجھ ملاقات کریساں ، ووہان اچ ڈاکٹراں، نرساں قربانیاں ڈتن ، پہلے توں ڈاکٹراں اتے طبی عملے دی فکر اے، اٹلی دے وزیراعظم نال وی گال تھئی اے انہاں وی اپنڑے طبی عملے دیاں قربانیاں دا ذکر کیتے کیوں جو اے لوک فرنٹ لائن تے جہاد کرنڑ آلے ہن ۔ وزیراعظم آکھیے جو صوبیں کوں ڈر ہئی جو باہروں آونڑ آلے پاکستانیاں نال وائرس مزید کھنڈ ویسی ، اج فیصلہ کیتے جو سمندر پار پاکستانیاں کوں واپس گھن آسوں ۔ واپس آونڑ آلے پاکستانیاں دا صرف کورونا ٹیسٹ تھیسی جیں دا ٹیسٹ پازٹیو آیا،و گھر اچ قرنطینہ تھیسن ۔اتے جیرھیاں شرطاں تے کاروبار کھولیا ویندا پئے انہاں تے عمل کرنڑاں چاہیدے ۔ وفاقی وزیر اسد عمر اج منگل کوں این سی او سی دے اجلاس دے بعد مزید تفصیلات بیان کریسن تے روزانہ دی بنیاد تے وی معلومات عوام کوں ڈتیاں ویسن ۔
