پروفیسر شوکت مغل دی وفات نال سرائیکی تحقیق اتے زبان و ادب دے پورے عہد دا خاتمہ تھی گئے، نامور ادیباں اتے دانشوراں دی تعزیت

ملتان ۔04 جون (اے پی پی)اکادمی ادبیات پاکستان دے چیئرمین یوسف خشک سمیت نامور ادیباںراتے شاعراں’ معروف ماہر لسانیات اتے دانشور پروفیسر شوکت مغل دے انتقال تے ڈکھ تے افسوس کیتے اتے آکھیا جو سرائیکی تحقیق اتے زبان و ادب دے پورے عہد دا خاتمہ تھی گئے۔چیئرمین یوسف خشک اپنڑے بیان اچ آکھیا جو سرائیکی اتے اردو زبان دے ممتاز محقق پروفیسر شوکت مغل دی وفات عملی اتے ادبی حلقیاں سانگے بہوں وڈا ضیان اے۔انہاں دی وفات نال جیڑھا خلا بنڑ گئے او کڈاہیں پورا نی تھی سگدا۔ایں توں انج اے پی پی نال گالھ مہاڑ کریندیں ہوئیں نامور ماہر تعلیم اتے مقتدرہ قومی زبان دے سابق سربراہ ڈاکٹر انوار احمدآکھیا جو شوکت مغل کلھیں جیڑھا کم کیتے او کئیں اداریاں تے بھاری اے۔ پروفیسر ڈا کٹر محمد امین آکھیا جو میڈا انہاں نال رفیق کار دے طور سوہنڑاں تعلق ہئی اتے ہک یار دی حیثیت نال میں انہاں کوں یکا مخلص پاتے۔ڈاکٹر صلاح الدین حیدر آکھیا جو او ہک مخلص اتے محنت کرنڑ آلے انسان ہن۔سرائیکی دانشور ظہوردھریجہ آکھیا جو اے سرائیکی تحریک سانگے ناقابل تلافی نقصان اے۔سرائیکی قومی موومنٹ دے چیئرمین دی حیثیت نال انہاں دی خدمات یکایادرکھی ویسن۔پروفیسر مقبول گیلانی آکھیا جو سرائیکی ادبی بورڈ دے صدر دی حیثیت نال انہاں مثالی کم کیتے۔ایں توں علاوہ سخن ورفورم دے عہدیداراں وسیم ممتاز، قمررضا شہزاد ،نوازش علی ندیم اتے شاکر حسین شاکر اپنڑے سانجھے بیان اچ آکھیا جو شوکت مغل ملتان دے ادبی تے ثقافتی منظر نامے کوں مونجھا کر ڈتے۔