کراچی اسٹاک ایکسچینج تے حملے دے ماسٹر مائنڈز تئیں وی پجا ویسی ، حملہ کرنڑ آلے چارے دہشت گرداں کوں ٹھکانڑیں لاڈتے ، چار جوان وی شہید تھئن ، وزیر داخلہ اعجاز شاہ

اسلام آباد ۔ 29جون (اے پی پی) وزیر داخلہ اعجاز شاہ آکھیے جو کراچی اسٹاک ایکسچینج تے حملے دے ماسٹر مائنڈز تئیں وی پجا ویسی تے انہاں کوں وی کیفر کردار تئیں پجایا ویسی ، حملہ کرنڑ آلے چارے دہشت گرداں کوں ٹھکانڑیں لاڈتے ، چار جوان وی شہید تھئن ۔ سنوار کوں واقعے تے گال کریندے ہوئیں وزیر داخلہ ڈسائے جو سنوار دی سویل دہشتگرداں جیرھے جو کلاشنکوفاں اتے خود کار ہتھیاراں نال مسلح ہن ، پارکنگ دے پاسے توں سٹاک ایکسچینج دی عمارت اچ داخل تھیونڑ دی کوشش کیتی قانون نافذ کرنڑ آلے ادارے دے نینگراں انہاں دا مقابلہ کیتا تے فائرنگ دے تبادلے اچ چارے دہشت گرد ماریے گئن جڈاں جو قانون نافذ کرنڑ آلے ادرے دے چار جواب وی شہید تھی گئن ، وزیر داخلہ ڈسائے جو ایں ویلھے رینجرز اتے قانون نافذ کرنڑ آلے ادارے دے اہلکاراں عمارت دا محاصرہ کیتا ہویا اے تے وختی عمارت کلیئر کر گھنسن ۔ وزیر داخلہ ایں عزم دا اظہار کیتے جو قانون نافذ کرنڑ آلے اداریں جیویں پہلے دہشت گرداں تے انہاں دے ماسٹر مائنڈز کوں کیفر کردار تئیں پجائے اینویں ایں واقعے اچ ملوث عناصر اتے ماسٹر مائنڈز کوں وی کیفر کردار تئیں پجایا ویسی ۔انہاں ڈسائے جو واقعہ دی تحقیقات دا عمل شروع تھی گے تے ماسٹر مائنڈز تئیں پج ویسوں ۔