اسلام آباد ۔ 31 جولائی (اے پی پی) وزیر خارجہ شاہ محمود قریشی ہک واری ول واضح کیتے جو کشمیرتے پوری قوم ہک مٹھ اے،کشمیریاں نال یکجہتی کیتے 5 اگست کوں یوم استحصال منیسوں،سویلے ڈاہ وجے پورے ملک اچ ہک منٹ دی خاموشی اختیار کیتی ویسی،بھارت کلیپے دا شکار تھی تے ”شائننگ “دی بجائے ” برننگ انڈیا“ بنڑچکیے۔اے گالھ انہاں اسلام آباد اچ وزیر اطلاعات و نشریات شبلی فراز اتے معاون خصوصی معید یوسف دے رلے کشمیر بارے پریس کانفرنس نال خطاب اچ آکھی۔ انہاں اعلان کیتے جو اسلام آباد دی کشمیر ہائی وے دا ناں وٹا تے سری نگر ہائی وے رکھیا ویسی۔وزیر خارجہ شاہ محمود قریشی آکھیے جو پچھلے سال 5 اگست کوں بھارت مقبوضہ کشمیر اچ کشمیریاں کوں اقلیت اچ بدلنڑ کیتے غیر قانونی طور تے علاقے کوں ترائے حصیاں اچ ونڈنڑ دی گھٹیا سازش کیتی اے جیکوں کشمیری عوام وی نئیں منیا،5 اگست 2019ءکشمیریاں دی جدوجہد اچ ہک نویں عزم دا ڈینھ اے کیوں جو جدوجہد آزادی اچ کشمیریاں اپنڑی رت وہائی اے،مقبوضہو ادی ہک سال توں محاصرے اچ اے،کشمیریاں دا جیونڑ اوکھ اے،اتے وادی ہک وڈی جیل اچ بدلیج گئی اے،ایں صورتحال اچ پاکستان کڈاھیں وی کشمیریاں کوں کلہا نئیں چھوڑ سگدا،پوری پاکستای قوم حق خود ارادیت سانگے کشمیریاں نال مونڈھا رلا تے کھڑی اے اتے وزیراعظم عمران خان اقوام متحدہ دی جنرل اسمبلی نال خطاب اچ تنازعہ کشمیر کوں نواں جیونڑ ڈتے،اج پورا جگ مسلہ کشمیر تے پاکستان دے نال کھڑے اتے بھارت ہر جاہ تے منہ لکیندا ودے۔شاہ محمود قریشی آکھیے جو 5 اگست کوں ہر پاکستانی کشمیری عوام نال یکجہتی کیتے باھرو نکلسی اتے اساں نویں نسل کوں وی مسلہ کشمیر بارے ڈسیسوں،ایں سانگے سفارتی کوششاں وی بیاں تیز کیتاں ویسن،5 اگست کوں سارے سفارتی مشنز اچ کشمیر بارے تصویری نمائشاں اتے کار ریلیز دا انتظام کیتا گئے،کینیڈا اچ خصوصی ریلی وی تھیسی،سوشل میڈیا کوں وی متحرک کیتا ویسی۔
