اسلام آباد ۔ 16 جولائی (اے پی پی) وزیراعظم دے معاون قومی صحت ڈاکٹر ظفر مرزا آکھیے جو کورونا وائرس پاروں اساڈی معیشت تے اثرات تھئن ، پولیو مہمات دے نہ تھیونڑ پاروں بالاں کوں پولیو وائرس دا خطرہ اے ،اساکوں موجودہ وقت اچ کورونا دے نال جیونڑ دی ضرورت اے ، میں سارے والدین توں درخواست کرینداں جو او اپنڑے بالاں کوں معذوری توں بچاونڑ کیتے پولیو دے قطرے ضرور پلاون ۔ بالاں دی بہتر صحت اساڈی ترجیح اے ۔خمیس کوں وزارت ولوں جاری بیان اچ انہاں آکھیے جو ولا پولیو مہم شروع کرنڑ دی منصوبہ بندی دے نال سانجھی مشاورت ترتیب ڈتی گئی اے اتے جون دے مہینے اچ باقاعدہ پولیو دے ٹیکنیکل ایڈوائزری گروپ توں منظوری گھدی گئی ۔ منصوبہ بندی موجب اگست اتے ستمبر اچ مخصوص علاقیں اچ اتے 2020 اچ ترائے قومی مہمات چلاونڑ دی حکمت عملی بنڑائی گی اے ، وزیراعظم عمران خان دی زیر صدارت تھیونڑ آلے 4 جولائی کوں نیشنل کمانڈاینڈ کنٹرول دے اجلاس اچ ول پولیو مہم کد آغاز دے فیصلے دی تعریف کیتی گئی ایں اجلاس اچ سارے صوبیں دے چیف سیکرٹریز وی شرکت کیتی ۔