ترجمہ: محمد جنیدملک،محمدنعیم خان
اسلام آباد ۔ 20جولائی (اے پی پی) پاکستان تحریک انصاف دی حکومت ولوں احساس پاکستان اچ غربت مکاونڑ، معاشرے دے غریب ترین تے ہینڑے طبقات دی امداد اتے انہاں کوں مالی طور تے خوشحال بنڑاونڑ کیتے شروع کیتا گیا اج تئیں دا سب توں وڈا پروگرام اے ۔پچھلے72 سال اچ اینجھا ودھ فیدہ مند اتے وڈے بجٹ دا عوامی فلاح و تحفیف غربت دا پروگرام پہلے کہیں وی حکومت کائینی ڈتا۔ وزیر اعظم عمران خان شروع توں ہی غربت مکاونڑ ،معاشرے دے کمزور طبقے دی حیاتی کوں چنگا کرنڑ،تعلیم دے ودھارے اتے انسانی و قدرتی وسائل دے چنگے استعمال تے زور ڈیندے آندن اتے اے نکات پاکستان تحریک انصاف دے منشور دا وی اہم حصہ ہن ۔ 2018 دے عام انتخابات اچ کامیابی دے بعد حکومت سنبھلیندے ہی وزیر اعظم عمران خان غربت مکاونڑ، معاشرے دے ہینڑے طبقات دا حیاتی گزارنڑم دا معیاراچا کرنڑ، تعلیم دے ودھارے اتے انسانی و قدرتی وسائل دے چنگے استعمال کیتے پالیسی بنڑاونڑ تے توجہ ڈتی اتے ایں اہم ایجنڈے کوں پورا کرنڑ سانگے انہاں 27 مارچ 2019 کوں احساس پروگرام دا اجراءکیتے۔ وزیر اعظم عمران خان آپنڑے خطابات اتے میڈیا نال گالھ مہاڑ اچ کئی واری چین دی مثال ڈیندے راہندن جو کیویں چین غربت توں تلے جیونڑآلی تقریباً 70 کروڑ آبادی کوں خط غربت توں کڈھیے جیندے نال چین ترقی دے پندھ ڈو ٹر پئے اتے اج جگ دی سب توں وڈی معاشی طاقت بنڑدا ویندے۔ایں سوچ پاروں انہاں احساس جہیاں ہمہ جہتی پروگرام شروع کیتے تاں جو غریباں خاص کر تریمتیں کوں خط غربت توں کڈھیا ونجے، غریب طبقات دے ذہین بالاں کیتے اعلیٰ تعلیم دے مواقع پیداکیتے ونجن، ملک اچ کاروباری ماحول بنڑے اتے نینگر ملازمت گولنڑ اچ رلنڑ دی بجائے کاروبار اتے انٹرپرینیورشپ ڈو آون۔ماضی اچ ڈتے گئے غربت مکاونڑ دے پروگراماں اچ ساری توجہ نقد ادائیگیاں تے ڈتی گئی ہئی اتے ایندے اچ وی ڈھیر پیسہ اصل حقداراں تئیں نہ پج سگدا ہئی،ایندی سب توں وڈی مثال بینظیر انکم سپورٹ پروگرام اے جیکوں شفاف ترین پروگرام آکھیا ویندا ہا بھل اجوکی حکومت نادرا دے ڈیٹا توں ایندی چھان بین کرائی تاں اینجھے 8 لکھ لوکاں دا پتا لگے جیڑھے کڈاھیں وی مستحق کائنا ہن،انہاں اچ سرکاری افسر،سرکاری ملازماں سودھے انہاں دے ٹبر دے لوک شامل ہن جنہاں کوں مستحقین دی فہرست اچوں کڈھیا گئے۔ایں تجربے کوں ڈیھدے ہوئے احساس دے تحت ادائیگیاں اچ شفافیت کوں اگونہاں رکھیا گئے اتے نادراددے ڈیٹا توں پوری چھان بین توں بعد ہی لوکاں کوں ایں پروگرام توں فیدہ چاونڑدی اجازت ڈتی گئی اے۔ احساس دے تحت ہنڑ تئیں جاری پروگراماں اچ احساس کیش ایمرجنسی کیش، احساس راشن پورٹل، احساس سکالرشپ، احساس پناہ گاہ اتے احساس لنگر، احساس کفالت، احساس بلاسود قرضے اتے احساس آمدن و اثاثہ جات منتقلی پروگرام شامل ہین دے تحت ہنڑ تئیں کھرباں روپے ادائیگیاں تھی چکئین اتے کروڑاں لوک فیدہ چیندے پئین۔شفافیت دے نال نال احساس دا ہک اہم حصہ کم اچ تیزرفتاری وی اے۔ جدید ٹیکنالوجی دے استعمال پاروں احساس دے سارے پروگراماں اچ اجراء توں گھن تے ادائیگیاں تئیں سارے مراحل بہوں تکھے مکمل کیتے گئین جیندی بہوں سوہنڑی مثال کورونا وباء دے بعد شروع کیتا گیا احساس ایمرجنسی کیش پروگرام اے جیندے اجراء ، درخواستاں دی وصولی، انہاں دی جانچ پڑتال اتے عملی رکاوٹاں مکاونڑ دے بعدساریاں ادائیگیاں صرف ترائے مہینے دے گھٹ ویلھے اچ مکمل کیتاں گئین اتے 17 جولائی تئیں 1 کروڑ29 لکھ 51 ہزارلوکاں اچ 156 ارب70 کروڑ روپے ونڈئیے گئین۔ایندی تفصیل موجب صوبہ سندھ اچ 38 لکھ 94 ہزارتوں ودھ لوکاں کوں 45 ارب 95 کروڑ روپے توں ودھ ونڈئیے گئین۔ صوبہ پنجاب اچ58 لکھ 31ہزارتوں ودھ لوکاں کوں 70 ارب 56 کروڑ روپے توں ودھ پیسے ڈتے گئین۔ خیبر پختونخوا اچ 22 لکھ 8 ہزارتوں ودھ لوکاں کوں 26 ارب 81 کروڑ روپے ملین۔ بلوچستان اچ 6 لکھ 44 ہزارتوں ودھ لوکاں اچ 7 ارب 83 کروڑ روپے توں ودھ رقم ونڈی گئی اے۔ایویں ہی آزاد جموں وکشمیر اچ 2 لکھ 11 ہزارتوں ودھ لوکاں کوں 2 ارب 58 کروڑ روپے توں ودھ رقم ونڈی اے۔گلگت بلتستان اچ 93 ہزارتوں ودھ مستحقین کوں 1 ارب 14 کروڑ روپے توں ودھ پیسہ ڈتا گئے۔ اسلام آباد اچ 66 ہزار توں ودھ لوکاں کوں 80کروڑ روپے توں ودھ رقم ونڈی گئی اے۔ایں ونڈی گئی رقم اچ 1.26 ارب روپے کفالت بقایا جات دی ادائیگیاں وی شامل ہین
۔احساس دے تحت مختلف پروگرامز دا اجراءکریندے ویلھے ایں گالھ دا خاص کرخیال رکھیا گئے جو غربت مکاونڑ اتے معاشرے دے کمزور طبقات دی چنگائی سانگے سارے آپشنز استعمال کیتے ونجن۔ہک پاسو تاں کورونا لاک ڈاﺅن اتے کاروبار دی بندش پاروں بے روزگار تھیونڑ آلے غریب ترین لوکاں کوں بھک اتے کُریح توں بچاونڑ کیتے 12 ہزار روپے دی نقد امدادڈتی گئی اتے بئے پاسوکورونا لاک ڈاﺅن اچ غریب طبقات کوں بکھ اتے کریح توں کڈھنڑ کیتے احساس راشن پورٹل دا وی اجرا کیتا گئے جیندے اچ احساس دا کردار مخیر ادرایاں، لوکاں اتے مستحقین وچال رابطہ کار اتے سہولت کاردا اے۔ حکومتِ پاکستان دا بنیادی کردار اہل مستحقین دا ڈیٹا ڈیونڑ اتے ڈونرزنال انہاں دا رابطہ بنڑاونڑ رکھیا گئے۔ مستحقین اتے ڈونر تنظیماں ڈوہیں پورٹل اچ اندراج کیتے مطلوبہ معلومات ڈیندن۔ مستحقین اتے ڈونرز www.rashan.pass.gov.pk تے اپنڑے آپ کوں رجسٹر کرواسگدن۔ مستحقین دی معلومات دی توثیق کیتی ویندی اے اتے احساس ڈیٹا دا استعمال کریندے ہوئے اہلیت دا تعین کیتا ویندے۔ڈونر تنظیماں کوں پروگرام اچ شراکت دار بنڑاونڑ کیتے مخصوص اہلیت دے معیاردے مطابق پرکھیا ویندے۔احساس راشن پورٹل تے ہنڑ تئیں 738869لوک راشن امدادکیتے آپنڑے آپ کوں رجسٹر کرواچکئین اتے ضرورت مند لوکاں کوں راشن ونڈنڑ شروع کر ڈتاگئے۔
ااحساس سکالرشپ دے تحت گھٹ آمدنی آلے طبقے دے ذہین طلباءو طالبات کوں اعلیٰ تعلیم ڈیواونڑ کیتے سالانہ 50 ہزار انڈر گریجویٹ طلبہ سانگے تعلیمی وظائف جاری کیتے گئین۔ چار سال اچ اے تعدادڈو لکھ تئیں پج ویسی اتے ایندے اچ 50 فیصد کوٹہ طالبات کیتے رکھیا گئے۔ انڈر گریجویٹ سکالرشپ پروگرام اعلی ٰتعلیم تئیں رسائی ودھاونڑ کیتے ہک نویکلی بلانگھ اے جیندے نال حکومت اے چاہندی اے جو کوئی طالبعلم مالی اخراجات پاروں تعلیم توں پچھو نہ رہ ونجے۔ایندے اچ ٹیوشن فیس اتے وظیفہ ڈوہیں شامل ہن۔ طالبات کیتے 50 فیصد وظائف رکھئیے گئین اتے ضرورت مند،گھٹ ترقی یافتہ اتے دور پار دے علاقیاں دی خاص کر حوصلہ افزائی کیتی ویندی پئی اے۔ طلبہ کیتے اہلیت دا معیارکہیں وی سرکاری شعبہ دی یونیورسٹی اچ میرٹ تے داخلہ رکھیا گئے اتے خط غربت توں گھٹ آمدن آلے ٹبراں دے طلباءکوں ترجیح ڈتی ویندی پئی اے۔ طلبہ http://ehsas.hec.gov.pk تے آن لائن یا مکمل کوائف نال درخواست فارم آپنڑی متعلقہ یونیورسٹی دے مالی امداد دے دفتراچ جمع کراسگدن
۔ملک دے وڈے شہراں اچ وڈی تعداد اچ لوک غربت پاروں سڑکاں دے کنارے، فٹ پاتھ، پارکس اتے کھلی جاہیں تے سمنڑ تے مجبورہن جیکوں موسماں دی ساریاں سختیاں کھلے آسمان ہیٹھ ای سہنڑیاں پوندن۔وزیراعظم عمران خان اے صورتحال ڈیہدے ہوئے ملک دے وڈے شہراں اچ پناہ گاہیں بنڑاونڑ دی سوچ ڈتی اتے ایکوں عملی شکل ڈیندے ہوئے اسلام آباد، لاہور، کراچی، پشاور، ملتان اتے بئے وڈے شہراں اچ پناہ گاہاں بنڑایاں گئین جتھاں غریب اتے بے سہارالوک آپنڑاں شناختی کارڈ ڈکھا تے مفت رہائش رکھ سگدن۔بعد ایں پروگرام کوںو دھیندے ہوئے انہاں پناہ گاہوں دے نال بیاں جاہیں خاص کر وڈے ہسپتالاں نال لنگر خانے وی بنڑائے گئین۔ہنڑ تئیں پبلک پرائیویٹ شراکت داری دے تحت پنجاب، سندھ، خیبرپختونخواہ اتے اسلام آباد اچ لنگر خانے کھل چکین۔ وزیر اعظم عمران خان ”احساس سیلانی لنگر“ سکیم دا افتتاح اسلام آباد اچ 7 اکتوبر 2019 کوں کیتے۔
ایں موقع تے وزیراعظم عمران خان آکھیا جو پورے ملک اچ پہلے مرحلے اچ 112لنگر خانے کھولئیے ویسن۔اے لنگر خانے انہاں علاقیاں اچ کھلیسوں جتھاں محنت کش،بے روزگاری اتے بکھ اے۔انہاں آکھیا جو حکومت کاروبار اتے صنعتاں دے ودھارے سانگے پورا تعاون کریندی پئی اے،اوکھا ویلھا اے پر ساکوں کمزور طبقے دا احساس اے اتے اساڈی کوشش اے جو لوک بکھے نہ رہون۔تریمتیں اساڈی آبادی دا ادھ توں ودھ ہن پر تعلیم اتے بئے میدان اچ پچھوں رہ ونجنڑ پاروں انہاں دا معاشرے دی ترقی اچ کردار نہ ہوونڑ دے برابر اے۔انہاں تریمتیں دے حالت بہوں ابتر اے جیڑھی جو بیوہ ہن یا انہاں کوں طلاق تھی گئی اے اتے او ڈوجھی شادی نی کرسگدیاں تے انہاں دا کماونڑ اتے کفالت کرنڑ آلا کوئی کائنی۔معاشرے دے ایں طبقے سانگے احساس کفالت پروگرام 31جنوری 2020 کو ں شروع کیتا گئیا ہئی۔ایں پروگرام دے تحت ہنڑ تئیں 4576463 مستحق تریمتیں فیدہ چاتے۔ایں پروگرام دے تحت ستر لکھ تریمتیں کوں کفالت کارڈز ڈتے گئین۔حکومت چاہندی اے جو ڈو سو ارب روپے مستحقین تئیں انہاں دے ہتھ اچ پجن۔ایں بارے ڈاکٹر ثانیہ نشتر آکھیا جو بی آئی ایس پی دے اعدادوشمار ڈاہ سال پرانڑے ہن،اجوکی حکومت باقاعدہ سروے اتے نادرا ڈیٹا بینک توں مستحقین کوں چنڑیے۔احساس کفالت پروگرام سانگے ڈوبینکاں نال معاہدہ کیتا گئے ،
احساس کفالت پروگرام 100 فیصد بائیو میٹرک اے، مستحق تریمتیں دی بینکاں تئیں رسائی کوں سوکھا بنڑا ڈتا گئے۔ نیشنل پاورٹی گریجویشن انیشی ایٹو“ دا جامع ملک گیر پروگرام ہکے ویلھے سو توں ودھ ضلعیاں اچ متعارف کروایا گئے۔ایں پروگرام دے تحت سود توں پاک قرضے،پیشہ وارانہ تے فنی تربیت دی سہولتاں ملسن۔ نیشنل پاورٹی گریجویشن انیشی ایٹو دا تخمینہ 42 ارب 65 کروڑ روپے لاتا گئے جیندا مقصد بہوں پسماندہ طبقے دے ٹبراں کوں غریبی توں باہر کڈھیا ونجے اتے انہاں کوں ترقی دی راہ تے لاتا ونجے۔پروگرام دے ترائے حصے ہن جنہاں اچ اثاثیاں دی ونڈ،بغیر سود دے قرضے اتے اثاثیاں دے موثراستعمال سانگے ہنرسازی شامل اے۔ایں پروگرام دا مقصد محروم طبقے دے ٹبراں دا زکواة،بیت المال اتے بے نظیر انکم سپورٹ پروگرام تے انحصار ختم کرتے انہاں کوں معاشی دھارے اچ رلا کراہیں خودمختار بنڑاونڑ اے۔ایں پروگرام اچ ایشیائی ترقیاتی بینک اتے بین الاقوامی فنڈ برائے زرعی ترقی دی مدد حاصل کیتی گئی اے۔ایندے اچ 40شراکتی اداریاں دی مدد حاصل اے۔ایں وچ اخوت اتے رورل سپورٹ پروگرام وی شامل اے۔پروگرام توں 100ضلعیاں اچ 16.28ملین لوک فیدہ چیسن جنہاں اچ پنجاہ فیصد تریمتیں شامل ہن۔25ہزار غریب ٹبراں اچ اثاثیاں دی ونڈ شامل اے۔ایں توں علاوہ کامیاب کاروبار چلاونڑ سانگے فنی تے کاروباری تربیت وی ڈتی ویندی پئی اے اتے ہر بندے کوں اوسطاً پنجاہ ہزار روپے دے اثاثے ڈتے ویندے پئن۔ایں توں علاوہ سود دے بغیر قرضے وی ڈتے ویندے پئن۔اثاثہ جات توں 1.15ملین لوک فیدہ چیسن۔بغیر سود قرضے ڈیونڑ ایں پروگرام دا اہم حصہ اے جئیں دے تحت 20 ہزار روپے توں 75 ہزار روپے تئیں دے80 ہزار قرضے ہر مہینے ڈیونڑ دا ٹارگٹ اے۔چار سالیں اچ کل 3.8ملین بغیر سود دے قرضے ڈتے ویسن۔پروگرام دے تحت اثاثے اتے بغیر سود دے قرضے گھنڑ آلیاں کوں فنی تربیت وی ڈتی ویسی تانجو اے بندے آپنڑاں کاروبار ودھا سگن۔
ایں مقصد سانگے وفاقی وزارت تعلیم تے پیشہ ورانہ تربیت اتے نیوٹیک توں تعاون گھدا گئے۔احساس آمدنڑ پروگرام 21فروری 2020 کوں شروع کیتا گئیا ہئی۔ایں پروگرام دے تحت ہنڑ تئیں 25054ٹبراں کوں 1.5ارب روپے دے چھوٹے اتے کاروباری اثاثے ڈتے گئن۔احساس پروگرام دے تحت وزیراعظم ’10 مارچ 2020 کوں احساس ضلعی پورٹل ڈیٹا فار پاکستان دا اجرا کیتے۔ایں پورٹل بنڑاونڑ حکومت دا حقائق تے وفاقی اتے صوبائی اتے ضلعی سطح تے اداریاں دے فیصلہ سازی دے عمل اچ اہم قدم اے۔احساس پروگرام بارے اے پی پی نال گالھ مہاڑکریندیں ہوئیں لاہور چیمبر آف کامرس اینڈ انڈسٹری دے صدر عرفان اقبال شیخ آکھیے جو میں پاکستان دے بہتر سالیں دی تریخ اچ ایں توں ودھ شفافیت اتے ایں توں ودھ چنگا پروگرام کائنی ڈٹھا۔ایندے نال کروڑاں لوکاں کوں فیدہ تھیسی،ساریاں توں چنگی گالھ اے جو اے لوکاں کوں انہاں دے گھر اچ پیسے ڈتے ویندے پئن۔اتے اینکوں پورا شفاف رکھیا گئے۔
انہاں آکھیا جو پہلا مرحلہ کامیابی نال پورا تھیونڑ دے بعد وزیراعظم ایندے ڈوجھے مرحلے دا اعلان کیتے،امید اے جو ڈوجھا مرحلہ وی پہلے مرحلے وانگوں ایں کامیابی نال لوکاں کوں فائدہ ڈیسی۔لاہور چیمبر خود وی ایں وچ ودھ چڑھ تے حصہ گھندے،اساں وزیراعظم دے فنڈز اچ ڈو کروڑ روپے،وزیراعلیٰ دے فنڈز اچ ہک کروڑ روپے اتے گورنر پنجاب دے فنڈاچ وی عطیات ڈتن اتے خود وی کم کریندے پیوں۔عرفان اقبال شیخ آکھیا جو جینویں اللہ دی مخلوق دی خدمت کیتی گئی اے اوندی پہلے کوئی مثال نی ملدی۔اساکوں امید اے جو اے پروگرام بئیا کامیاب تھیسی اتے دل تے جان نال ایندے نال ہیسے۔اسلام آباد چیمبر آف کامرس اینڈ اندسٹری دے ایگزیکٹو ممبر بابر چوہدری آکھیا جو وزیر اعظم عمران خان دی حکومت جیڑھا احساس پروگرام شروع کیتے اے بہوں چنگا پروگرام اے،جیڑھے لوک وی غریبی دی لکیر توں تلے زندگی لنگھیندے پئن انہاں سانگے اے ہک ریلیف اے۔اے پی پی نال گالھ مہاڑ کریندیں ہوئیں انہاں آکھیا جو پہلے توں کاروباری حالات بہوں خراب ہن پر کورونا نال کاروبار بند تھی گئے تاں غریب بہوں اوکھ اچ آگئے۔حکومت احساس پروگرام دے تحت انہاں کوں جیڑھا کیش ڈتے اتے بہوں سوہنڑی گالھ اے۔
ایں نال انہاں کوں وختی طور ریلیف ملے اتے او اپنڑی لوڑھ پوری کرسگدن۔بابر چوہدری آکھیا جو ایجھے پروگرام بئے وی ہوونڑے چاہیدن۔احساس پروگرام توں لوک اپنڑاں معیار زندگی کجھ بہتر کر سگدن۔اساکوں چاہیدے جو وزیراعظم دی سپورٹ کروں تانجو حکومت بئے ایجھے پروگرام شروع کرسگے۔اسلام آباد اسٹیٹ ایجنٹس ایسو سی ایشن دے جنرل سیکرٹری چوہدری زاہد رفیق آکھیا جو میں وزیر اعظم عمران خان اتے معاون خصوصی ثانیہ نشتر کوں مبارک ڈینداں جو انہاں احساس کیش دا پروگرام شروع کیتے اتے پورے ملک اچ غریب لوکاں کوں انہاں دے در تے پیسے ڈتن۔اے پی پی نال گالھ مہاڑ کریندیں ہوئیں انہاں آکھیا جو ایں پروگرام دی پورے جگ اچ مثال نی ملدی،جیندے نال شفافیت اتے چنگے انداز اچ لوکاں دی خدمت کیتی گئی ہووے۔ایجھے پروگرام جاری رہونڑے چاھئیدن۔اے پاکستان تحریک انصاف دے ویڑن دے مطابق اے۔پنجاب یونیورسٹی انسٹی ٹیوٹ آف ایجوکیشن اینڈ ریسرچ دے پروفیسر ڈاکٹر عبدالقیوم چوہدری آکھیا جو کہیں وی معاشرے اچ جے احساس نہ ہووے تاں نہ او ں معاشرے اچ امن تھی سگدے اتے نہ ای ترقی تھی سگدی اے۔
احساس پروگرام دے تحت 50 ہزار انڈر گریجویٹ سٹوڈنٹس کو ں سکالر شپ ڈتی گئی اے۔ایں نال نہ صرف او سٹوڈنٹ آپنڑے تعلیمی خرچے پورے کریسن جڈانجو انہاں بالاں دے اندر وی احساس پیدا تھیسی جو انہاں حکومت دے ایں قدم کوں کینویں ریٹرن کرنڑے،اتے ملک کوں واپسی ڈیونڑے۔اے پی پی نال گالھ مہاڑ کریندیں ہوئیں پرووفیسر ڈاکٹر عبدالقیوم چوہدری آکھیا جو میں ایں پروگرام دی تعریف کرینداں اتے امید کرینداں جو حکومت احساس سکالر شپ پروگرام جیہے پروگرام وی شروع کریسی، ہیلتھ اتے ایجوکیشن سیکٹر اچ جی ڈی پی کا پورشن وی ودھائی ویسی تانجو اے ڈوہیں سیکٹرز ترقی کرن اتے اساڈاملک وی ترقی کرے۔پنجاب یونیورسٹی دے اسسٹنٹ پروفیسر ڈاکٹر محمد راشد آکھیا جو وزیراعظم عمران خان جتنے وی پروگرام شروع کیتن انہاں اچ غریباں کوں ڈٹھا گئے،چاہے او احساس کفالت پروگرام ہووے یا سستا گھر پروگرام۔ احساس سکالر شپ پروگرام دے تحت محنتی اتے ذہین تے غریب طلبا کوں آپنڑی تعلیم پوری کرنڑ دا موقع ملئیے۔
پنجاب یونیورسٹی اچ ایم فل دی طالبہ مدیحہ خان آکھیا جو وزیراعظم دے کم لوکاں کوں سہولت ڈیندے پئن اتے انہاں اچ ساریاں توں چنگا پروگرام احساس سکالر شپ پروگرام اے جیڑھا جو غریب طلبا تے طالبات کوں تعلیم دے موقع ڈیونڑ سانگے شروع کیتاگئے۔لہور دی رہنڑ آلی ہک تریمت نسرین بی بی اے پی پی نال گالھ مہاڑ کریندیں ہوئیں آکھیا جو وزیر اعظم دا احساس کفالت پروگرام بہت چنگا اے اتے ایں نال غریباں دا بہوں فائدہ تھیے۔اساکوں امید اے جو اے پروگرام چلدا رہسی اتے جیڑھے لوکاں کوں کورونا اچ پیسے کائنی ملیے انہاں کوں وی مل ویسن۔اسلام آباد اچ محنت مزدوری کرنڑ آلے محمد طارق آکھیا جو احساس لنگر خانہ اچ انہاں کوں ترائے ویلھے دا ٹکر پانڑی ملدے،پارسل وی چنگے طریقے نال ملدے اتے کوئی اوکھ کائنی تھیندی۔اے حکومت بہوں چنگا کم کیتے۔آزاد کشمیر دے ہک شہری ظفر اے پی پی کوں ڈسیا جو اوضلع باغ توں آئن اتے انہاں ڈے رہنڑ دی جاہ کائنا ہئی ،عمران خان دا شکریہ ادا کریندوں جو انہاں رہنڑ دا بندوبست کیتے اتے اساں عزت نال اتھاں رہندوں اتے اتھاں دا عملہ وی بہوں چنگا اے۔
