دیامربھاشا ڈیم دی تعمیرنال گلگت بلتستان بالخصوص چلاس اچ ترقی دے نویں دور دا آغاز تھیسی ، منصوبے دی تکمیل نال ملازمتاں دے نویں موقع بنڑسن ، وزیر اعظم عمران خان

چلاس ۔ 15 جولائی (اے پی پی) وزیر اعظم عمران خان آکھیے جو دیامربھاشا ڈیم دی تعمیر نال گلگت بلتستان بالخصوص چلاس اچ ترقی دے نویں دور دا آغاز تھیسی، حکومت گلگت بلتستان سمیت ملک دے پسماندہ علاقیں اچ تے لوکاں دی ترقی تے خصوصی توجہ ڈیندی پئی اے ، پن بجلی دی پیداوار نال نہ صرف ماحول تے منفی اثرات کائناں پوسن بلکہ ملک اچ سستی بجلی بنڑسی ، ایں منصوبے دی تکمیل نال ملازمتاں دے نویں موقع بنڑسن ۔اے گال انہاں بدھ کوں گلگت بلتستان دے دورے دے دوران عوامی اجتماع توں خطاب کریندے ہوئیں آکھی اے وزیراعظم عمران خان آکھیے جو اوہے قوماں تری کریندن جیرھیاں اگوں ودھنڑ دا سوچیندن ۔ اوکھے فیصلے کریندن۔ عوامی صلاحیتاں کوں اجاگر کرنڑ کیتے اقدامات کریندن ۔ انسانی وسائل دی ترقی تے سرمایہ کاری کریندن ۔ انہاں آکھیے جو انصاف دی فراہمی، قانون دی حکمرانی اتے صحت و تعلیم دیاں سہولتان تے توجہ ڈیونڑ آلیاں قوماں ترقی دیاں منزلاں طے کریندن او ظلم توں آزاد تھی ویندن ۔انہاں آکھیے جو دور اندیشی تے عمل کرنڑ آلیاں قوماں ترقی کریندن جیویں چین ترقی کیتی ۔ چین وچ 30سالہ منصوبے بنڑائے گئن ۔ انہاں آکھیے جو اساڈے ملک اچ گھٹ مدت دے منصوبے بنڑائے گے ،انتخابات دے تناظر اچ منصوبے بنڑائے گے ۔انہاں آکھیے جو اللہ تعالیٰ پاکستان کوں دریاواں ، پانڑیں سمیت بے پناہ وسائل نال نوازیے ۔انہاں آکھیے جو اساڈے دریاواں تے پن بجلی دے منصوبیں دی تعمیر دے بہوں سارے موقع موجود ہن ۔ انہاں آکھیے جو گلگت بلتستان سمیت پسماندہ علاقیں تے لوکاں دی ترقی اساڈی اولین ترجیح اے ۔ خیبر پختونخوا اچ ضم تھیونڑ آلے قبائلی ضلعیں کوں وی فنڈز ڈیندے پیون ۔بلوچستان دے پسماندہ علاقیں تے وی توجہ ڈیندے پیوں ۔ انہاں آکھیے جو ایں منصوبیں دی تکمیل نال گلگت بلتستان بالخصوص چلاس دے لوکاں کوں فائدہ تھیسی ۔