ملتان۔ 12جولائی(اے پی پی)سرائیکی صوبے دے بغیر مسئلے حل کائنا تھیسن، رانا اعجاز محمود مرحوم سیاستدان نہ ہن پر انہاں دی سیاسی بصیرت سیاستداناں توں ودھ کراہیں ہئی ۔اے گالھیں معروف دانشور ، سابق ڈائریکٹر تعلقات عامہ تے ڈائریکٹر بہاولپور آرٹس کونسل رانا اعجاز محموددی یاد اچ کیتے گئے تعزیتی ریفرنس اچ کیتی گئی ،ریفرنس سرائیکستا ن قومی کونسل ولوں تھیا۔میزبانی دے فرائض ظہور دھریجہ نبھائے۔ تقریب نال اسٹیشن ڈائریکٹر ریڈیو پاکستان آصف کھیتران ، رضی الدین رضی ، ڈائریکٹر تعلقات عامہ ملتان سجاد جہانیہ ، شاکر حسین شاکر، محبوب تابش ، جنرل سیکرٹری بہاولپور پریس کلب ریاض بلوچ ، ترجمان پاکستان سرائیکی پارٹی ملک جاوید چنڑ ایڈووکیٹ ، انجم پتافی ، شریف خان لشاری ، اسلم خان بلوچ تے بنہاں خطاب کیتا۔منظوم نذرانہ عقیدت معروف شاعر عباس ملک ، حاجی بشیر ملتانی ،ظفر مسکین ، رشید دھریجہ اتے ریڈیو پاکستان ملتان دی سنگر ثوبیہ ملک کیتا۔آصف خان کھیتران آکھیا جو مرحوم بہوں خوبیاں دے مالک ہن،تعلقات بنڑاونڑ اتے تعلق کوں نبھاونڑ دا ہنر انہاں کوں امدا ہئی ۔او حقیقی معناں اچ تعلقات عامہ دے افسر ہن۔رضی الدین رضی آکھیا جو رانا اعجاز محمود کتاب نال محبت کریندے ہن ،انہاں دا نالج بلا دا ہئی ۔شاکر حسین شاکر آکھیا جو مرحوم بہوں خوبیاں دے مالک ہن،انہاں دی ساریاں توں وڈی خوبی انہاں دی یاری ہئی ۔سجاد جہانیہ آکھیا جو اج میں جیڑھا کجھ ہم او رانا اعجاز پاروں ہم،رانا اعجاز دی گھردی زبان پنجابی ہئی پر او خود کوں سرائیکی آکھدے ہن،او اساڈے اجوکے ڈی جی پی آئی دے بعد سینئر افسرہن۔ظہور دھریجہ آکھیا جو رانا اعجاز محمود کتاب دے دلدادہ ہن،جڈاں وی انہاں کوں نویں کتاب بھیجیندا ہم او خوش تھی ویندے ہن،او میکوں ولا ولا آکھدے ہن جو سرائیکی اچ لٹریچر اتے جنرل نالج دی بہوں گھٹکی اے،ایں پاسے توجہ ڈتی ونجے۔صوبے دے مسئلے تے او اتنے کلیئر ہن جو صوبے دے فائدے بارے گھنٹہ گالھیں کریندے ہن۔ ریاض بلوچ آکھیا جو بہاولپور ہک چنگے افسر اتے چنگے یار توں محروم تھی گئے۔ انجم پتافی ، ملک جاوید چنڑ ، اتے شریف خان لشاری آکھیا جو رانا اعجاز محمود دی خدمات کوں یکا یاد رکھیا ویسی۔او اکثر آکھدے ہن جو صوبے دے بغیر وسیب دے مسئلے حل کائنا تھیسن۔ایں مقصد سانگے ساریاں کوں کٹھا تھیونڑاں پمسی۔سول سیکرٹریٹ نی صوبائی سیکرٹریٹ ہوونڑاں چاہیدے اتے وسیب کوں کٹھا رکھنڑ سانگے ضروری اے جو صوبے دا دارالحکومت ملتان ہووے۔
