مشہور شاعرہ ماہ طلعت زاہدی لمبی علالت دے بعد اللہ کوں پیاری تھی گئی

ملتان۔ 12جولائی(اے پی پی)مشہورشاعرہ،نقاداتے خاکہ نگارماہ طلعت زاہدی لمبی علالت دے بعد اللہ کوں پیاری تھی گئی ۔انہاں دی عمر 67سال ہئی اتے او گزریل ڈو سالیں توں کینسر دا شکار ہن۔اومشہورشاعر ،دانشوراتے ماہرتعلیم ڈاکٹراسداریب دی ذال،مشہورمعالج ادیب ،شاعر،افسانہ نگارڈاکٹرمقصودزاہدی مرحوم دی صاحبزادی اتے مشہور شاعر افسانہ نگار اتے مترجم ڈاکٹرانورزاہدی دی بھینڑ ہن۔ماہ طلعت زاہدی 8ستمبر 1953ءکوںملتان اچ جمی۔انہاں 1967ءاچ گورنمنٹ گرلز سکول نواں شہر توں میٹرک کیتا۔گرلزڈگری کالج کچہری روڈ ملتان توں 1969اچ ایف اے اتے1972ءاچ بی اے کیتا۔1977ءاچ ایمرسن کالج بوسن روڈ توں ایم اے کیتا۔او طالب علمی دے زمانے توں شاعری کریندی پئی ہن ۔ہنڑ تئیں انہاں دی نظماں دے ڈو غزلاں دے اتے سہ حرفیاں دا ہک ہک مجموعہ شائع تھیے۔جڈانجو سفر نامہ انگلستان،تاب نظارہ نہیں‘دے ناں نال آیا۔مشہور ادیباں ،شاعراں اتے دانشوروں انہاں دے انتقال تے ڈکھ تے افسوس کیتے ۔ڈاکٹراسلم انصاری ،ڈاکٹرانواراحمد،پروفیسرانورجمال ڈاکٹرمحمد امین ایم ایم ادیب ،اظہرسلیم مجوکہ ،شاہدراحیل آکھیا جو او ہک نفیس تریمت اتے باصلاحیت شاعرہ ہن۔سخن ورفورم دے عہدیداراں وسیم ممتاز،رضی الدین رضی ،شاکرحسین شاکر ،قمررضاشہزاد،نوازش علی ندیم ،سہیل عابدی ،ضیاءثاقب بخاری ،اسرارچودھری اتے قیصرعباس صابراپنڑے سانجھے بیان اچ آکھیا جو ماہ طلعت زاہدی ادبی بیٹھک دے تاسیسی اراکین اچوں ہن انہاں دی وفات ملتان دے علمی تے ادبی اتے ثقافتی منظر نامے اچ ہک ایجھا خلاءبنڑ گئے جیڑھا پُر نہ تھی سگسی۔