ملتان ۔ 04جولائی(اے پی پی)نویں لگنڑ آلے ایڈیشنل چیف سیکرٹری ساﺅتھ پنجاب زاہد اختر زمان آکھیا جو ملتان اچ کیمپ آفس اتے نواںسیکرٹریٹ بہاولپور اچ ہوسی اتے ایجھا سسٹم بنڑیسوں جو ڈیرہ غازی خان اتے ملتان دے لوکاں کوں بہاولپور نہ ونجنڑاں پووے۔ملتان آونڑ دے موقع تے اپنڑی پہلی پریس کانفرنس نال خطاب کریندیں ہوئیں انہاں آکھیا جو حکومت ولوں ساﺅتھ پنجاب اچ بطورایڈیشنل چیف سیکرٹری تعیناتی میڈے سانگے اعزاز اے۔وزیراعلیٰ پنجاب جنوبی پنجاب دی عوام کوں ریلیف ڈیونڑ اتے انہاں دے مسئلیاں دے فوری حل سانگے اے کم کیتے۔جنوبی پنجاب سیکرٹریٹ کوںفعال کیتا ویند اپئے اتے سارے محکمیاں دے سیکرٹری اپنڑے پورے سٹاف نال ایں سیکرٹریٹ اچ بہسن۔جنوبی پنجاب دے ترقیاتی منصوبے ہنڑ جنوبی پنجاب سیکرٹریٹ اچ منظوری تھیسن۔پی اینڈڈی محکمہ فنانس دے سیکرٹری وی جنوبی پنجاب سیکرٹریٹ اچ پورے اختیار نال کم کریسن۔ہنڑ جنوبی پنجاب دے سارے ترقیاتی فنڈز اتھاں خرچ تھیسن ۔ایں موقع تے کمشنر ملتان ڈویژن شان الحق ’ انتظامی معاملات تے ایڈیشنل چیف سیکرٹری ساﺅتھ پنجاب زاہداخترزمان کوں تفصیلی بریفنگ ڈتی۔
