چیف جسٹس آف پاکستان عذیر بلوچ اتے نثار مورائی دی جے آئی ٹی رپورٹس اچ سندھ حکومت ولوں ردوبدل تے سوموٹو نوٹس گھنن، وفاقی وزیر بحری امور علی حیدر زیدی دا وزیر اطلاعات و نشریات سینیٹر شبلی فراز دے رلے پریس کانفرنس توں خطاب

اسلام آباد ۔ 7 جولائی (اے پی پی) وفاقی وزیر بحری امور علی حیدر زیدی سندھ حکومت دی ولوں عذیر بلوچ اتے نثار مورائی دی جے آئی ٹی رپورٹس اچ ردوبدل تے چیف جسٹس آف پاکستان توں سووموٹو نوٹس گھننڑ دی اپیل کیتی اے ۔ وفاقی وزیر اطلاعات و نشریات سینیٹر شبلی فراز دے رلے پریس انفارمیشن ڈیپارٹمنٹ اچ پریس کانفرنس توں خطاب کریندے ہوئیں انہاں آکھیے جو دنیا اچ رائٹ تے لیفٹ دی سیاست تھیندی اے جڈاں جو اتھاں رائٹ اتے رانگ دی سیاست تھیندی پئی اے ۔ انہاں آکھیے جو میں جے آئی ٹی رپورٹس منظر عام تے گھن آونڑ کیتے طویل جدوجہد کیتی اے ، ہنڑ سندھ حکومت اﷲ اﷲ کرتے اے رپورٹس پبلک کیتی اے ۔ انہاں آکھیے جو ملزم جے آئی ٹی رپورٹ اچ 158 قتل دا خود اعتراف کر چکے ۔ انہاں آکھیے جو سندھ حکومت جیرھی جے آئی ٹی رپورٹ ریلیز کیتی اے او نامکمل اے ، جے آئی ٹی اچ جیرھے انکشاف کیتے گئن ایندے اچ اے نی ڈسایا گیا جو ملزم کیں دے آکھنڑ تے اے سارا کجھ کیتے تے ایندا فیدہ کیں کوں تھئے ۔ انہاں آکھیے جو اساں وڈی لمبی جدوجہد دے بعد اقتدار اچ آیوں ، عمران خان دی مہربانی نال وزیر وی بنڑ گیوں ، اساں ملک بدالنڑ آیوں ملک کوں صحیح رستے ٹورنڑ ضروری اے اللہ دا نظام سزا تے جزا تے مشتمل اے ایندے تے عمل کیتا ونجے ۔ علی زیدی آکھیے جو عذیر جان بلوچ اپنڑے بیان حلفی اچ اقرار کیتے جو او سینیٹر یوسف بلوچ دے آکھنڑ تے وزیر اعلیٰ سندھ قائم علی شاہ اتے فریال تالپور نال ملیا تے اپنڑے خلاف ہیڈ منی ختم کراونڑ دا آکھیا جیرھا جو فریال تالپور اتے آصف زرداری دے آکھنڑ تے ختم کیتی گئی ۔ علی زیدی آکھیے جو جے آئی ٹی رپورٹ دے آخری صفحے تے بیان حلفی اچ عزیر بلوچ آکھیے جو میکوں ڈر اے جو انہاں انکشافات دے بعد میکوں تے میڈے گھر آلیں کوں جان توں مارڈتا ویسی جیں کیتے میں درخواست کرینداں جو مکمل حفاظت کیتی ونجے کیوں جو میکوں آصف زرداری تے بئے سیاسی لوک بشمول جنہاں دا ذکر بیان اچ اے انہاں توں انتقامی کارروائی دا خطرہ اے۔ علی زیدی آکھیے جو بلدیہ فیکٹری دی جے آئی ٹی وی بہوں مشکل توں ریلیز کیتی گئی ، جے آئی ٹی وچ ڈسایا گے جو کیویں اداریں کوں تباہ کیتا گئے ۔ انہاں آکھیے جو سندھ پولیس دے ایس پی ڈاکٹر رضوان احمد رپورٹ کڈھی تاں انہاں دا ٹرانسفر شکارپور کرڈتا گیا، انہاں اتھاں ڈوجھی رپورٹ کڈھی ۔ علی زیدی آکھیے جو ڈاکٹر رضوان احمد چنیسر گوٹھ محمود آباد جیرھا جومیڈا حلقہ انتخاب اے، بارے میں اپنڑی رپورٹ اچ آکھیے جو اتھاں فرحان غنی ناں دابندہ منشیاب فروشاں دی مدد کریندے او سندھ دے صوبائی وزیر سعید غنی دے بھرا ہن ۔ انہاں آکھیے جو ایں رپورٹ دے بعد ڈاکٹر رضوان احمد کوں فارغ کرڈتا گیا ، ٹرانسفر کر ڈتا گیا۔ علی زیدی آکھیے جو جے آئی ٹی رپورٹس کےتے میں 2017ءاچ چیف سیکرٹری سندھ کوں خط لکھیا لیکن جواب نی ملیا ۔