اسلام آباد ۔ 16 جولائی (اے پی پی) صدر مملکت ڈاکٹر عارف علوی وفاقی محتسب دی کارکردگی دی تعریف کریندے ہوئیں عام بندے کوں انہاں دے دروازے تے وختی تے سستے انصاف ڈیونڑ دی ضرورت تے زور ڈتے ۔اے گال انہاں وفاقی محتسب سید طاہر شہباز نال ایوان صدر اچ ملاقات کریندے ہوئیں آکھی اے وفاقی محتسب سید طاہرشہباز صدر مملکت کوں اپنڑے ادارے دی کارکردگی بارے ڈسایا ۔ انہاں آکھیے جو 2019ء دے دوران 75 ہزار توں ودھ کیسز نبیڑ ڈتن جیں اچوں 97 فیصد کیسزدے فیصلیں تے عمل درآمد کیتا گئے ۔ انہاں آکھیے جو وفاقی محتسب دے1039 کیسز اچ نظر ثانی دیاں اپیلاں دائر کیتیاں گیاں جڈاں جو317 کیسز اچ صدر پاکستان کوں اپیلاں دائر کیتیاں گیاں جیرھیاں جو مجموعی کیسز دا 0.4 فیصد بنڑدن ۔انہاں آکھیے جو صدر مملکت وفاقی محتسب دے 90 فیصد فیصلیں کوں برقرار رکھیے ۔صدر مملکت ڈاکٹر عارف علوی وفاقی محتسب دی کارکردگی اتے خصوصی اقدامات دی تعریف کریندے ہوئیں امید ظاہر کیتی جو وفاقی محتسب انتظامی نا انصافی دے خلاف لوکاں دی مدد کیتے کوششاں جاری رکھیسی ۔
