ملتان۔ 25 جولائی (اے پی پی) وفاقی وزیر شاہ محمود قریشی آکھیے جو گرے لسٹ توں نکلنڑ کیتے قانون سازی ضروری اے، 8 بل تیار کرگھدن جیندے تے ہر ممکن صلاح مشور کیتا ویسی،سمارٹ لاک ڈاون دی کامیابی پاروں کرونا کیسز اچ کمی چنگی گالھ اے،اللہ چاہا تاں ایں وبا کوں تیکھے مکا ڈیسوں،آندے عید اتے محرم اچ لوک احتیاط اصلوں نہ چھوڑن۔ملتان اچ میڈیانال گالھ مہاڑ کریندے انہاںا ٓکھیے جو فنانشل ٹاسک فورس سانگے 8بل تیارکرگھدن،گرے لسٹ ساکوں پچھلی حکومت ولوں ملی ہئی،جتھو نکلنڑ کیتے قانون سازی دی لوڑھ اے ،انہاں قوانین تے وزارت قانون نال مشاورت کیتی اے جڈاں جو نیب قوانین اچ ترامیم کیتے وی ہک بل تیار اے،سارے بلزمشاورت کیتے اپوزیشن کوں بھیج ڈتن،سنوار کوں اپوزیشن نال باھسوں اتے ڈیکھسوں جو کیا پیش رفت تھیندی اے کیوں جو کرپشن فری پاکستان ہر کہیں دی لوڑھ اے بھل پیپلز پارٹی اتے ن لیگ 10 سال تئیں نیب قوانین اچ چنگائی نئیں گھن آ سکے۔شاہ محمود قریشی آکھیا جو ملک اچ کرونا کیسز اچ کمی آندی پئی اے، اموات وی گھٹ تھی گین،شکر اے ماہرین دے خدشے غلط ثابت تھین اتے وزیراعظم عمران خان دی سمارت لاک ڈاون دی پالیسی سرخرورہی اے جیکوں پورا جگ منیندا پئے،اج پاکستان اچ کرونابارے اندازے غلط ثابت تھی گین،نہ او کیسز دی تعداد اے نہ شرح اموات تشویشناک اے،اللہ دا شکر اے جو اوں پاکستان کوں کرونا دی تباہ کاریاں توں بچائے بھل ساکوں اموات تے ڈکھ اے،چنگی گالھ اے جو پاکستان اچ کرونا دی صورتحال قابو اچ آگئی اے،ہسپتالاں تے دباو اتے وینٹی لیٹرز تے لوک گھٹدے پین۔انہاں آکھیے جو وڈی عید اتے محرم کرونا دے حوالے نال ڈو وڈے امتحان ہین، امید اے جو لوک انہاں موقعیاں تے وی ذمہ داری ڈکھیسن اتے ایس او پیز تے عمل جاری رکھسن کیوں جو نکی جھیں کوتاہی ولا مصیبت گھن آ سگدی اے۔
