اسلام آباد ۔ 11 اگست (اے پی پی) صدر مملکت ڈاکٹر عارف علوی آکھیے جو اج دے ڈینھ اساں ایں عزم دا اعادہ کریندوں جو معاشرے اچ برداشت تے رواداری دے رویے کوں برقرار رکھیا ویسی ، اقلیتی برادری ملک دی ترقی تے خوشحالی اچ اہم کردار ادا کریندی پئی اے، اقلیتاں دے ڈینھ دے موقع تے اپنڑے سنھیے وچ صدر مملکت آکھیے جو اج دا ڈینھ پاکستانی تاریخ اچ خصوصی اہمیت رکھیندے ۔ ایں ڈینھ اساں اپنڑی اقلیتاں نال راوداری نال پیش آونڑ دے ایں وعدے دی تجدید کریندوں جیں دا اظہار قائد اعظم محمد علی جناح 11 اگست 1947ءکوں پا کستان دی دستور ساز اسمبلی دے سامنڑے کیتا ہئی ۔ ایں اہمیت دے پیش نظر 11 اگست کوں اقلیتا ںدا ڈینھ سرکاری طور تے منایا ویندے تاں جو انہاں دی مذہبی آزادی اتے فلا ح و بہبود کوں ودھارا ملے ۔انہاں آکھیے جو اقلیتاں دے نال رواداری نہ صرف اساڈے معاشرے دے خمیر اچ شامل اے بلکہ اساڈا مذہب اسلام وی سارے مذہب دے نال بردباری دا سبق ڈیندے ۔حضو رﷺ دی حیات طیبہ اتے احادیث توں وی اساکوں اقلیتاں دے نال برابری دا سلوک کرنڑ دا سبق ملدے۔ ریاستِ مدینہ، جیرھی اساں کیتے ہک مثالی ریاست دی حیثیت رکھیندی اے اساکوں اقلیتاں دے نال بردباری اتے انصاف دا رویہ روا رکھنڑ دا درس ڈیندی اے ۔ میثاقِ مدینہ اچ، مدینہ وچ وسنڑ آلے سارے مذہب دے لوکاں کوں انہاں دے سیاسی ، سماجی اتے معاشی حقوق دی ضمانت ڈتی گئی ۔
