ملتان ۔11 اگست(اے پی پی)ریڈیوپاکستان ملتان دی اسٹیشن ڈائریکٹرکوثرثمرین آکھیے جو اساں ایں واری آزادی دا ڈینھ کورونا وائرس توں نجات تے لاک ڈاﺅن توں آزادی دے ماحول اچ منیندے پیوں ۔ایں موقع تے جتھان اساں جنگ آزادی دے شہداءاتے رہنماواں کوں خراج عقیدت پیش کریندے پیوں اتھاں کورونا دے خلاف جنگ اچ آپنڑیاں جاناں دا نذرانہ پیش کرنڑ آلے مسیحائیں کوں وی یاد کریندے پیوں۔اے اساڈے او ہیروہن جنہاں اپنڑاں اج اساڈے کل کیتے قربان کرڈتا تے اے انہاں دیاں قربانیاں تے حکومت دی سمارٹ لاک ڈاﺅن پالیسی دا نتیجہ اے جو پاکستان پنج مہینے بعد معمول دیاں سرگرمیاں دے آسے ول آئے ۔اے گال انہاں سنوار دی شام ریڈیوپاکستان ملتان دے سٹوڈیوز اچ جشن آزادی دی تقریبات دے سلسلے اچ ”چاندمیری زمین پھول میراوطن“دے عنوان توں منعقد تھیونڑ آلے خصوصی مشاعرے اچ میزبان دی حیثیت نال خطاب کریندے ہوئیں آکھی اے ۔انہاں مزیدآکھیے جو اے ریڈیو پاکستان ملتان دا اعزاز اے جو ایں واری جشن آزادی دے موقع تے قومی نشریاتی رابطے تے ملتان دا مشاعرہ نشر کیتا ویندا پئے ۔انہاں آکھیے ایں سلسلے اچ ڈائریکٹرجنرل ریڈیوپاکستان عنبرین جان اتے ڈائریکٹرپروگرام خالدہ نزہت دی خاص طورتے شکرگزار آں جو انہاں ایں واری کہیں بئے شہر دی بجائے ملتان شہر کوں چنڑیے تے اے اقدام وزیراعظم عمران خان دی ایں پالیسی داتسلسل اے جیں دے تحت او جنوبی پنجاب دے عوام دیاں محرومیوں دے ازالے کیتے اقدامات کریندے پن ۔ادیب اتے شاعر معاشرے دی آواز ہوندن اتے سرائیکی علاقے دے قلمکاراں ہمیشہ توں آپنڑی شاعری دے ذریعے اپنڑے خطے دے ڈکھاں کوں چاتے ۔ایں موقع تے جیرھے شعرا وطن عزیز اتے شہدائے کورونا کوں خراج تحسین پیش کیتے انہاں اچ قمررضاشہزاد، مستحسن خیال ،ڈاکٹرمقبول گیلانی ،تحسین غنی ،ناصربشیر، صائمہ نورین بخاری، اشعرحسن کامران ، ڈاکٹرشہزادہ وحیداتے تانیہ سلیم عابدی شامل ہن ۔پروگرام دے پروڈیوسرقمرہاشمی اتے ایگزیکٹوپروڈیوسرجعفربلوچ ہن ۔
