اسلام آباد ۔ 11 اگست (اے پی پی) وفاقی وزیر مذہبی امو ر پیر نورالحق قادری انکشاف کیتے جو سوشل میڈیا تے مقدس ہستیاں بارے توہین آمیز مواد اسرائیلی ایجنسی موساد ولوں ہک سوچے سمجھے منصوبے دے تحت کھنڈایا ویندا پئے ، اٹھ فقہیں اچوں کہیں وی فقہ دے منڑ آلیں کوں کافر قرار نی ڈتا ونج سگدا ، علماءکرام دا فرض اے جو او ایںسازش کوں ناکام بنڑاونڑ تے امت دے درمیان اتحاد پیدا کرنڑ کیتے محراب تے منبر دا استعمال کرن ، اسلامی نظریاتی کونسل دی تیار کیتی گئی سفارشات محراب و منبر تئیں پجنڑیاں چاہیدن ، حکومت ہر قیمت تے آپ دی رٹ برقرار رکھیسی ۔ منگل کوں اسلامی نظریاتی کونسل اچ مختلف مسالک دے منڑ آلیں دے درمیان روابط دے عنوان توں منعقدہ کنونشن اچ بطور مہمان خصوصی خطاب کریندے ہوئیں انہاں آکھیے جو کجھ عرصہ توں سوشل میڈیا تے مقدس ہستیاںبارے توہین آمیز گال مہاڑ سوچے سمجھے منصوبے دے تحت کھنڈائی ویندی پئی اے ۔ایں دے باوجود پاکستان کوں عدم استحکام توں ڈو چار کرنڑ دی چار عشریں تے محیط کوششاں ناکام تھئن ۔انہاں آکھیے جو ملک اچ سنی، شیعہ، اہلحدیث اتے بریلویاں کوں آپت اچ لڑاونڑ دیاں کوششاں وی ناکام تھئن ۔
