قائد اعظم دے پاکستان دے پاسے اساڈا سفر شروع تھی گئے ، اے ایجھا پاکستان ہوسی جتھاں سارے شہری قانون دی نظر اچ ہک برابر ہوسن ، وزیراعظم عمران خان

اسلام آباد ۔ 14 اگست (اے پی پی) وزیراعظم عمران خان قوم کوں آزادی دے 73 سال پورے تھیونڑ تے مبارخ ڈیندے ہوئیں آکھیے جو قائد اعظم دے پاکستان دے پاسے اساڈا سفر شروع تھی گئے ، اے ایجھا پاکستان ہوسی جتھاں سارے شہری قانون دی نظر اچ ہک برابر ہوسن، قانون ساریں کیتے ہک ہوسی پاکستان ہک اسلامی فلاحی ریاست بنڑسی ۔جمعے کوں آپنڑے ہک ٹویٹ اچ وزیراعظم عمران خان آکھیے جو میں قوم کوں ایں گال تے مبارخ ڈینداں جو ماضی دیاں حکومتاں توں توانائی دا شعبہ اساکوں ورثے اچ تباہ حال ملیے ایندے اچ بہتری گھن آندے پیوں ۔انہاں ڈسائے جو طویل مذاکرات دے بعد اساں آئی پی پیز دے نال ہک معاہدہ کیتے جیں اچ بجلی دی قیمت گھٹ تھیسی تے قردشی قرضیں دا مسئلہ وی حل تھیسی ۔ انہاں آکھے جو اساڈا اگلا ہدف بجلی دی ونڈ دے نظام اچ اصلاحات کرنڑ اے ۔ وزیراعظم کشمیری بھینڑ بھراواں دے ناں آپ دے سنھیے وچ آکھیے جو پوری پاکستانی قوم حق خود ارادیت دی جدوجہد اچ انہاں دے رلے ہے ۔ بھارت دے غیر قانونی قبضے اتے ظالمانہ اقدامات دے خلاف اساں آپنڑے کشمیری بھراواں تے بھینڑیں دی ہرطرح دی حمایت جاری رکھیسوں ۔ وزیراعظم عمران خان قوم کوں کورونا وائرس دا کامیابی نال مقابلہ کرنڑ تے وی مبارخ ڈتی ۔انہاں آکھیے اساڈی حکومت نہ صرف سمارٹ لاک ڈاﺅن اتے نقد امداد دے پروگرام دے ذریعے غریب عوام کوں فاقیں توں مرنڑ توں بچائے بلکہ حکومت دی بہترین حکمت عملی پاروں کورونا دے کیس گھٹ تھئن ۔ وزیر اعظم آکھےی جو میں قوم کوں ڈو سال دی بھر پور جدوجہد دے بعد معیشت دی صورتحال اچ بہتری تے مبارخ ڈینداں ۔ کرنٹ اکاﺅنٹ اتے مالیاتی خسارے گھٹ تھی گن ۔ تعمیرات شعبہ کھلنڑ نال روزگار دے موقع ودھ گن ۔ سٹاک مارکیت اتے ویندی پئی اے ۔اے چیزاں معاشی صورتحال اچ بہتری دی عکاس ہن۔