قومی اسمبلی انسداد دہشتگردی (ترمیمی) بل 2020ءدی منظوری ڈے ڈتی

اسلام آباد ۔ 12 اگست (اے پی پی) قومی اسمبلی انسداد دہشتگردی (ترمیمی) بل 2020ءدی منظوری ڈے ڈتی اے ۔ وفاقی وزیر قانون فروغ نسیم آکھیے جو اسلام امن دا دین اے اینکوں دہشتگردی نال نی جوڑیا ونج سگدا ‘ قانون سازی اچ بنیادی انسانی حقوق دا تحفظ یقینی بنڑایا ویسی ۔ بدھ کوں قومی اسمبلی اچ وفاقی وزیر قانون فروغ نسیم تحریک پیش کیتی جو انسداد دہشتگردی (ترمیمی) بل 2020ءتے غور کیتا ونجے ۔سید نوید قمر آکھیا جو دہشتگردی دی صورتحال اچ ملک بہوں سارے مسئلیں دا سامنڑاں کیتے۔ اے بل کالعدم تنظیماں تے پابندی متعلق اے جیرھا وی پاکستان یا پاکستان توں باہر اسلام دے ناں تے دہشتگردی کریندے اساں سارے اوندے خلاف رل تے لڑسوں۔ خواجہ محمد آصف آکھیا جو اساڈا مقصد پاکستان دے شہریاں دے بنیادی حقوق دا تحفظ اے۔ شاہ محمود قریشی آکھیے جو اتھاں منی لانڈرنگ رہی اے اساں ایندا تدراک کرنڑاں اے ۔ قانون سازی متوازن ہوونڑیں چاہیدی اے ۔ ارکان دی مثبت تجاویز شامل کیتیاں ویسن ۔ میں وزیر قانون اتے انہاں دی ٹیم کوں مبارخ ڈینداں ۔انہاں آکھیے جوایف اے ٹی ایف دے آکھنڑ توں پہلے ہی اساکوں اے قانون سازی از خود کرگھننڑیں چاہیدی ہئی ۔ محسن شاہنواز رانجھاآکھیے جو اساں بطور رکن قومی اسمبلی آئین دے تحفظ دا حلف چا رکھیے۔ اساڈی ذمے واری اے جو اساں پاکستان دے عوام دے بنیادی حقوق دا تحفظ یقینی بنڑاﺅں۔ وفاقی وزیر قانون فروغ نسیم آکھیے جو ایں قانون دی اتفاق رائے توں منظوری تے سارے ارکان دا شکر گزار آں اساں ساریں دا مقصد ہک اے ۔ آئین جیرھی بنیادی انسانی حقوق ڈتن انہاں دی خلاف ورزی کائناں تھیسی ۔اساں اپوزیشن دی تجاویز دا خیر مقدم کیتے۔ قانون سازی دی نشاندہی کیتی ونجے اساں اینکوں گھٹ کریسوں ۔ اساں ملک دی معیشت کوں بلیک توں وائٹ کرنڑ چاہندوں ۔ اگر پاکستان کوں اگوں ونجنڑ اے ترقی یافتہ ملک بنڑاونڑاں اے تاں اساکوں ایف اے ٹی ایف اتے منی لانڈرنگ جیہے معاملات تے توجہ کرنڑیں ہوسی ۔بل دی پہلی خواندگی تے ایوان توں صلاح گھدی گئی جیں دی ایوان منظوری ڈتی ۔ایندے بعد سپیکر بل دیاں مختلف شقاں دی ایوان توں ہک دے بعد بئی منظوری گھدی ۔ بل دیاں کجھ شقاں اچ حکومت ولوں پارلیمانی سیکرٹری ملیکا بخاری ترامیم پیش کیتیاں جیں دی ایوان منظوری ڈتی ۔ وزیر قانون فروغ نسیم تحریک پیش کیتی جو انسداد دہشتگردی (ترمیمی) بل 2020ءمنظور کیتا ونجے ۔ قومی اسمبلی بل دی منظوری ڈتے ڈتی ۔