مہان سرائیکی گلوکار شفاءاللہ خان روکھڑی جھوک لڈاگئن

اسلام آباد ۔ 29 اگست (اے پی پی) مہان سرائیکی گلوکار شفاءاللہ خان روکھڑی دل دا دورہ پوونڑ پاروں انتقال کرگئن ۔ سرائیکی گلوکار شفاءاللہ خان روکھڑی کوں اچانک دل دا دورہ پیا جنہاں کوں علاج کیتے اسلام آباد علاج کیتے گھن آیا گیا جتھاں انہاں دم ڈے ڈتا ۔ انہاں دی میت میانوالی کیتے روانہ کرڈتی گئی اے ۔انہاں دی نماز جنازہ اتے تدفین انہاں دے آپنڑے آبائی علاقہ روکھڑی اچ کیتی ویسی ۔ شفاء اللہ خان روکھڑی سرائیکی فوک کوں پوری دنیا اچ متعارف کروایا اتے انہاں دے ایں انداز گائیگی پاروں پوری دنیا اچ انہاں دے پرستاراں دی تعداد موجود اے ۔گلوکاری توں پہلاں شفاءاللہ خان روکھنڑی پنجاب پولیس اچ ملازمت کریندے ہن انہاں کوں گاونڑ دا بہوں شوق ہئی ،انہاں آپنڑاں شوق پورا کرنڑ کیتے پولیس دی ملازمت کوں چھوڑ ڈتا ، انہاں دے شوق انہاں کوں گلوکار بنڑا ڈتا ،انہاں موسیقی دے میدان اچ قدم رکھیا ڈاہ سال تئیں گلوکاری اچ محنت کریندے رہیے تے 1995اچ آپ دا پہلا البم ریلیز کیتا جیں انہاں کوں وڈی کامیابی ڈیوائی۔ شفاءاللہ خان روکھنڑی سرائیکی گلوکاری دا ہک وڈا ناں ہئی انہاں سرائیکی گائیگی اچ جدت پیدا کیتی جیں کوں ڈیکھدے ہوئیں بہوں سارے گلوکاراں انہاں دے انداز کوں کاپی کیتا تے آپنڑاں ناں بنڑایا ۔شفاءاللہ خان روکھڑی دا گایا ہویا گاونڑ ” اج کالا جوڑا پا“ تے ” کوئی روہی یاد کریندی“ سانول ول آ توں“ نہاموں جئیں خواب اچ آیا ماہی“ سمیت بہوں سارے سرائیگی گیت گا کراہیں پوری دنیا اچ شہرت پاتی ۔