وزیر خارجہ مخدوم شاہ محمود قریشی دا وژن ایف او دے تحت کورونا عالمی وبائی چیلنج دے دوران دنیا اچ چنگی خدمات سرانجام ڈیونڑ آلے پاکستانیاں دی پذیرائی کیتے ”فارن منسٹرز آنرز لسٹ“ دا اعلان

اسلام آباد ۔ 13 اگست (اے پی پی) وزیر خارجہ مخدوم شاہ محمود قریشی دا وژن ایف او دے تحت کورونا عالمی وبائی چیلنج دے دوران دنیا اچ چنگی خدمات سرانجام ڈیونڑ آلے پاکستانیاں دی پذیرائی کیتے ”فارن منسٹرز آنرز لسٹ“ دا اعلان کرڈتا۔ آنرز لسٹ دا باقاعدہ اعلان خمیس کوں وزارت خارجہ اچ وزیر خارجہ مخدوم شاہ محمود قریشی دی زیر صدارت منعقدہ خصوصی تقریب اچ کیتا گیا ۔ فارن منسٹرز آنرز لسٹ اچ شامل باہرلے ملک رہنڑ آلے پاکستانیاں کوں مختلف کیٹگریز دے تحت چنڑیا گئے ۔ پہلی کیٹگری اچ او شہدا شامل ہن جنہاں آپ دی جاہ دی پرواہ کیتے بغیر انسانیت دی خدمت جاری رکھی ۔ ڈوجھی کیٹگری او ہیلتھ ورکرز/ڈاکٹرز شامل ہن جنہاں مثالی خدمات سر انجام ڈیندے ہوئیں قیمتی جاناں کوں بچائے ۔ تریجھی کیٹگری اچ او شخصیات شامل ہن جنہاں کورونا وبا دے دوران امدادی سرگرمیاں اچ ودھ چڑھ تے حصہ گھدا ۔ ایں آنرز لسٹ اچ دنیا اچ رہنڑ آلے 86 پاکستانیاں دا ناں شامل اے ۔ تقریب توں خطاب کریندے ہوئیں وزیر خارجہ شاہ محمود قریشی آکھیے جو انہاں پاکستانیاں کورونا وبا دے دوران اپنڑیاں خدمات نال ملک تے قوم دا ناں روشن کیتے ۔ آنرز فہرست اچ شامل پاکستانیاں صحیح معنے اچ پاکستان دا سفیر ہوونڑ دا حق ادا کیتے تے اپنڑے طرز عمل نال ملک کیتے نیک نامی دا باعث بنڑین۔