اسلام آباد ۔ 2 اگست (اے پی پی)معروف امریکی اخبار وال سٹریٹ جنرل پاکستان اچ کرونا کیسز دی شرح اچ ریکارڈ کمی کوں وزیراعظم عمران خان دی اگونڑی اچ حکومت دی بہترین حکمت عملی دا نتیجہ قرار ڈتے اتے اعتراف کیتے جو پچھلے ڈو مہینے اچ پاکستان اچ کرونا کیسز دی شرح اچ اسی فیصد کمی تھئی اے جڈاں جو نویں کرونا مریضاں اتے وینٹی لیٹرز تے ونجنڑ آلے مریضاں سودھا اموات دی شرح اچ تیزی نال کمی تھیندی پئی اے،پاکستان دے سب توں وڈے شہر کراچی سودھا ملک دے وڈے ہسپتالاں اچ کورونا وائرس دے مریضان کیتے بیڈز خالی تھیندی پین،ہک مہینے اچ وینیٹی لیٹرز تے ونجنڑ آلے مریض ادھے رہ گین،پاکستان اچ بھارت اتے ایران دے ہمسایہ ملکاں دے مقابلے اچ کورونا وائرس دے مریضاں دی تعداد تیزی نال گھٹی اے۔اخبار لکھیے جو وزیراعظم عمران خان عالمی ادارہ صحت دا مکمل لاک ڈاﺅن دے مشورہ دی مخالفت کریندے ہوئے ایکوں معاشرے دے غریب وکمزورطبقات اتے معیشت کیتے بہوں نقصان دہ قرار ڈتے اتے انہاں کرونا دے باوجود معیشت کوں مرحلہ وار کھولنڑ دا فیصلہ کیتے سمارٹ لاک داون حکمت عملی اپنائی اے جیندے نال کرونا نال متاثرہ لوکاں دی امداد، بحالی، روزگار و کاروباری دی بحالی سودھا معیشت کوں تکڑا کرنڑ اچ مدد ملی اے۔رپورٹ موجب حالی پاکستان کوروناتے مکمل قابوپاونڑ دا اعلان نئیں کیتا جیکر لوکاں وڈی عید اتے محرم تے حفاظتی تدابیرتے عمل نہ کیتا تاں کرونا دی صورتحال اچ بہتری ضائع تھی سگدی اے اتے کیسز ولا ودھ سگسن بھل حالی تئیں کرونا دی صورتحال بہوں حوصلہ افزا اے جو نویں کیسز وی گھٹدے پین اتے کرونا مریض وی تیزی نال صحتیاب تھیندے پین،پاکستان اچ کرونا پروں لوکاں دے رویے مثبت طور تے وٹیجن ،انہاں ماسک پاونڑ،دستانے استعمال کرنڑ،ہینڈسینی ٹائیزرلاونڑشروع کیتے،سماجی دوری اپنائی اتے ہر جاہ تے آگاہی دا ذریعہ وی بنڑین جیندے نال صورتحال قابو اچ آئی اے۔جان ہاپکنزیونیورسٹی دے مطابق ہکو جھیں آبادی دے ملک برازیل دے مقابلے اچ پاکستان اچ صورتحال بہوں قابو اچ اے اتے انفیکشن دی شرح بہوں گھٹ گئی اے۔لندن سکول آف ہائیجین اینڈ ٹراپکل میڈیسن دی پروفیسراینا وسال اخبار کوں ڈسائے جو پاکستان اچ وائرس دے پھیلاﺅ اچ کمی ہک بہوں وڈی کامیابی اے،ایندا تعلق سماجی رویے نال بھل ایکوں میچنڑ ممکن کائنی۔امپرئیل کالج لندن ہک مادل اچ اگست اچ پاکستان اچ ہر ڈینھ 30 ہزار اموات دا اندازہ لایا ہئی بھل پاکستان اچ نویکلی خصوصیات پاروں وائرس پچھو رہ گئے،ودھ نینگر آبادی،سماجی فاصلیاں دے ودھ مواقع اتے حکومتی ایس او پیز تے عمل نال مثبت نتیجے نکلین اتے حکومتی حکمت عملی تے تنقید کرنڑ آلے لوک وی ایں پیش رفت تے حیران ہین جو حکومت کیویں گھٹ وسائل دے باوجود سوکھیں قابو پا گھدے۔اخبارکرونا دے خلاف جنگ اچ پاک فوج دے کردار دی وی تعریف کیتی ۔
