اسلام آباد ۔ 10 ستمبر (اے پی پی،سرائیکی سروس) سرائیکی عوامی تریمت تحریک دی جنرل سیکرٹری ادی سعدیہ شکیل کراچی پریس کلب دے باہروں احتجاج ویلھے میڈیا نال گال مہاڑ کریندے ہوئیں انہاں دا آکھنڑ اے جو فکر دی گالھ اے جو نشوم بال بھاویں چھوہر ہووے یا چھوہریں کتھائیں وی ونجے امان کائنی ، دینی تعلیم ڈیونڑ مدارس اچ پٹھوں توں زیادتی کیس ، گھر قاری سڈو یا ٹیوٹر تاں زیادتی دا واقعہ کڈاہیں ہمسایہ قاتل نکلدے کڈاہیں سکا چاچا یا کوئی بیا رشتے دار ہنڑ کیا کیتا ونجے ہکے واری سبھنائیں کوں مار تے دفنا ڈیوں؟ تریمت گھر چلاونڑ جانڑدی اے تاں درندہ گھات لاتی بیٹھا ہوندے

انہاں دا آکھنڑ اے جو کڈاں موقع ملسی جو ایندی نشوم بالڑی کوں چیر پھاڑ تے کھا ونجاں اتے اے وحشی درندے ہر گلی چنڈ اچ لکے ودے ہوندن جنہاں کوں آپ دی جنسی بھک مٹاونڑ کیتے کڈاہیں پنج بالاں دی ماءکوں مار ڈیندن تاں کڈاہیں نینگر پتر کھا ویندن تے ظلم دی انتہا اے جو انہاں دی بجلت ست پنج تے ترائے سال دیاں نکیاں کلیاں توں وی پوری نئیں تھیندی ۔ سوچنڑ دی گال اے جو اے اگر قاتل گرفتار وی تھی ویندے تاں پھاسی دی سزا وی تھیندی اے یا ول جرم تکھے کیوں ودھدا ویندے۔ میکوں ایں گال دا بہوں احساس تھیندا پئے جو کورونا دی وبا توں لوک کتھائیں مر نہ ونجن اے مرض ہک توں ڈوجھے کوں نہ لگے کئی کمپین چلائیاں گئیاں نہ صرف پوری دنیا سودھے ملک تے صوبائی ہی نی گلی گلی سنھیا ڈتا گیا، سائن بورڈ لاتے گئن ، پابندیاں لاتیاں گیاں تے ہنڑ سکول اچ باقاعدہ پڑھایا وی ویسی جو کتھائیں تساں تے جراثیم حملہ نہ کرے ہتھ نی ملاونڑاں ، کیا کیا اقدامات کائنی کیتے گئے، انہاں آکھیے جو اساں لوک نانگ نکل ونجنڑ دے بعد لکیر پٹنڑ آلے لوک ہیسے خدا کیتے گھر گھر گلی گلی ماواں تے بالاں کوں تربیت ڈیونڑ دی بہوں لوڑھ اے

انہاں دا آکھنڑ اے جو پہلی کلاس اچ ہی بالاں کوں اے باقاعدہ تعلیم ڈتی ونجے جو تساکوں ہتھ لاونڑ دا حق صرف ماءپیو دا اے ماواں دی تربیت دی وی سخت لوڑھ اے ۔ اتھاں ہر روز نشوم شہزادیاں کوں کوئی دیو ،نوچ تے کھاویندے انہاں وچوں ہک ہک پنج سالاں دی نکی مروہ وی ہئی جیں کوں زیادتی دے بعد قتل کرتے محلے دے کچرے اچ سٹ ڈتا گیا ۔سرائیکی عوامی تریمت تحریک دی رہنما ادی عابدہ بتول دی سربراہی اچ کراچی پریس کلب دے سامنڑے پوری سرائیکی عوامی تریمت تحریک بھرپور احتجاج کیتا ، انہاں آکھیے جو صرف قاتلاں کوں گرفتار نی کرنڑاں بلکہ اساڈا مطالبہ اے جو انہاں کوں سرعام پھاسی ڈتی ونجے ۔