جنیوا ۔ 29 ستمبر (اے پی پی) اقوام متحدہ دارالحکومت نئی دہلی اچ ریلوے ٹریک دے نیڑے کچیاں وستیاں اچ رہنڑ آلے ڈھائی لکھ لوکاں کوں اعتماد اچ گھدے بغیر بے دخل کرنڑ دے بھارتی فیصلے تے تشویش دا اظہار کیتے ۔ اقوام متحدہ جنیوا توں جاری بیان اچ آکھیے جو مناسب رہائش متعلق اقوام متحدہ دے خصوصی رپورٹر بالاکرشنن راجا گوپال دی رپورٹ موجب حکومت فیصلہ کرنڑ توں پہلے متاثرہ لوکاں دا موقف نی سنڑیا ۔ایندے توں پہلے بھارتی سپریم کورٹ متاثرہ 48 ہزار گھرانڑیں کوں جاہ خالی کرنڑ کیتے ترائے مہینے دا وقت ڈتا ہئی ۔ ناقدین عدالت دے ابتدائی فیصلے تے وی تشویش دا اظہار کیتے جیں اچ آکھیا گیا ہئی جو کہیں وی عدالتی حکم کالعدم کرنڑ دی اجازت نہ ڈتی ونجے ۔ بھارتی نژاد راجہ گوپال فیصلے کوں ریلوے لائن دے نال رہائش پذیرگھٹ آمدنی آلے طبقے کوں انصاف ڈیونڑ توں مکمل انکار دے مترادف قرار ڈتے ۔انہاں آکھیے جو بنیادی انسانی حقوق دے بین الاقوامی قانون داآرٹیکل 2.3 ہر بندے کوں عدالتی ریلیف حاصل کرنڑ دا صوابدیدی حق ڈیندے ، بھارتی حکومت ایندی پوری خلاف ورزی دی مرتکب ہوسی ۔ بین الاقوامی ماہر انسانی حقوق چتاونڑیں ڈتی اے جو لوکاں کوں بے گھر کرنڑ انساناں دے معاشی ، سماجی اتے ثقافتی حقوق متعلق بین الاقوامی عہد نامے دے تحت بھارت دی ذمہ داریاں دے منافی اے۔
