ملتان ۔ 10 ستمبر (اے پی پی) ملتان اچ بلدیاتی انتخابات کراونڑ کیتے تیاریاں زورپکڑ گئن ،ایں سلسلے اچ ایڈیشنل ڈپٹی کمشنر ہیڈکواٹر رانااخلاق احمد خان دی صدارت وچ انتظامات دا گزشتہ ڈینھ جائزہ اجلاس تھیا ،جیں اچ اسسٹنٹ کمشنر صدر شہزاد محبوب،اسسٹنٹ کمشنر شجاع آباد محمد زبیر اتے اسسٹنٹ کمشنر جلالپور پیروالہ غلام سرور،ڈسٹرکٹ الیکشن کمشنر دے نمائندیں تے لوکل گورنمنٹ دے افسراں شرکت کیتی ۔اجلاس اچ ڈسٹرکٹ ریٹرنگ آفیسر،ریٹرنگ آفیسرز اتے اسسٹنٹ ریٹرنگ آفیسرز دی تعیناتی کیتے فہرستاں مکمل تے ضلع دے سکیل 1 توں 17 دے ملازمین دا کمپیوٹرائزڈ ڈیٹا تیار کیتا گیا۔ایں موقع تے ایڈیشنل ڈپٹی کمشنر ہیڈ کوارٹرملازمین تے افسراں دا سارا ڈیٹا ڈسٹرکٹ الیکشن کمشن آفس دے حوالے کرنڑ دی ہدایت کیتی ۔انہاں آکھیے جو سارے اسسٹنٹ کمشنرز پولنگ اسٹیشنزدے قیام کیتے سرکاری بلڈنگز دا تعین کرن،ایجھیاں بلڈنگز کوں چنڑیا ویسی جتھاں بجلی تے پانڑیں دی سہولت ہووے ۔ڈیٹا دی تیاری ویلھے آبادی دے نیڑے واقع سرکاری عمارتاں کوں ترجیح ڈتی ونجے ۔رانااخلاق احمد خاں آکھیا جو مجوزہ پولنگ اسٹیشنز دا ڈیٹا ڈسٹرکٹ الیکشن کمشنر کوں بھجوایا ویسی۔شفاف بلدیاتی الیکشن کیتے محکمہ تعلیم تے لوکل گورنمنٹ دا سارا انفراسٹرکچر ڈتا ویسی ۔
