اسلام آباد ۔ 11 ستمبر (اے پی پی)گھر دے وچ خونی رشتے درندگی کریندن کہیں وی جاہ تے بال محفوظ کائنی اے گال سرائیکی عوامی تریمت تحریک دی چیئرپرسن اگوانڑ عابدہ بتول نشوم بال تے بالڑیاں اتے تھیونڑ آلے ظلم تے زیادتیاں دے خلاف کراچی پریس کلب دے سامنڑے احتجاجی ریلی توں میڈیا نال گال مہاڑ کریندے ہوئیں آکھی اے ۔انہاں آکھیے جو معاشرے کوں سبق ڈیونڑاں چاہیدے اتے حکومتی رٹ قائم کیتی ونجے،کیا درندگی دے ڈر توں بالاں کوں سکول نہ بھیجا ونجے ؟ ایں سویں واقعات اتے سزا مقرر کیتی ونجے، انہاں آکھیے ایف آئی آر نامعلوم لوکاں دے خلاف کٹی ویندی اے۔ ایہو سویں واقعات دے ثبوت وی مسخ کرڈتے ویندن اتے گواہ مکر ویندن کجھ سیاسی لوک انہاں دی پشت پناہی وچ وی ملوث ہن ۔ ایں صورت حال پاروں مجرم بری تھی ویندن، مجرم بری تھیونڑ دے بعد مدعی دے گھر ونج تے انہاں کوں جان توں مارنڑ دیاں تڑیاں ڈیندن ۔انہاں آکھیے جو غریب پہلے وی لٹیا پیا ہوندے او ڈر پاروں ول کجھ نئیں کرسگدا۔انہاں آکھیے جڈاں انصاف نہ ملسی کیا او مجرم نہ بنڑسی؟ ایں صورت حال پاروں مجرم ودھدے ویندن، مجرم کوں جڈاں تئیں سزا نہ ملسی او ول ایہو سویں حرکت کریسی،اساں ہر ظلم دے خلاف خاص طور تے تریمتاں اتے نشوم بالڑیاں تے تھیونڑ آلے ظلم دے خلاف اساڈی سرائیکی عوامی تریمت تحریک مذمت کریندی اے اساں ہر فورم تے الاونڑ کیتے ویسوں جڈاں تئیں انصاف نہ ملسی حکومتی رٹ قائم نہ تھیسی اوں ویلھے تئیں اساں آپنڑاں احتجاج ختم نہ کریسوں۔
