اسلام آباد ۔ 9 ستمبر (اے پی پی)وزیراعظم عمران خان قومی اسمبلی دے حلقہ این اے 189توں رکن اسمبلی اتے ممبر پبلک اکاونٹس کمیٹی خواجہ شیراز محمود دی سفارش تے تحصیل تونسہ شریف دے مختلف علاقیاں اچ سکولاں دی اپ گریڈیشن اتے نویں گرلز و بوائز ڈگری کالج ڈیونڑسانگے تیکھے اقدامات کرنڑ دی ہدایت کریندے ایں سانگے پیش رفت رپورٹ منگ گھدی اے۔وزیراعظم آفس ولوں جاری کیتے گئے نوٹیفکیشن موجب ٹھٹھہ لغاری پرائمری سکول،گرلز مڈل سکول کلر والا ،گرلز ایلیمنٹری سکول جھوک بودو ،گرلز ایلیمینٹری سکول بستی چھتری،بوائز ایلیمنٹری سکول بیٹ لدھا اتے بوائز اتے گرلز ایلیمنٹری سکول بیٹ بھیڈیں والی کوں ہائی سکول دا درجہ ڈیونڑدی منظوری ڈتی اے۔نوٹیفکیشن موجب ریتڑہ اچ نواں بوائز ڈگری کالج اتے ٹبی قیصرانی اچ گرلز ڈگری کالج بنڑاونڑ دی وی منظوری ڈتی گئی اے۔نوٹیفکیشن اچ سیکرٹری محکمہ اعلیٰ تعلیم پنجاب اتے سیکرٹری سکولزپنجاب کوں ہدایت کیتی اے جو احکامات تے فوری کارروائی کریندے ہوئے عملدرآمد وی تیکھے وزیراعظم آفس کوں پیش کرن۔ ایں توں پہلے رکن قومی اسمبلی خواجہ شیراز محمود اسلام آباد اچ وزیراعظم عمران خان نال تھیونڑ آلیاں ملاقاتاں اچ اپنڑے علاقے اچ مختلف ترقیاتی منصوبیاں خاص کر تعلیمی شعبے دی ترقی سانگے سکولاں دی اپ گریڈیشن اتے نویں کالج بنڑاونڑ دی درخواست کیتی ہئی۔سکولاں دی اپ گریڈیشن اتے نویں کالج بنڑاونڑدی منظوری تے تحصیل تونسہ دے لوکاں وزیراعظم عمران خان دا شکریہ ادا کریندے خواجہ شیراز محمود دی علم اتے عوام دوستی کوں خراج تحسین پیش کیتے جو انہاں عوامی عوامی نمائندگی دا سوہنڑا حق ادا کیتے۔
