سرائیکی عوامی تریمت تحریک پاکستان دی مشہور سرائیکی شاعر عزیز شاہد دے پتر فرخ عزیز دی فوتگی تے ڈکھ دی سانجھ

اسلام آباد ۔ 29 ستمبر (اے پی پی) سرائیکی عوامی تریمت تحریک پاکستان دی اگوانڑ عابدہ بتول، کرن لاشاری، سعدیہ شکیل،آفصہ اکبر ملک، ساجدہ پروین، ادی نِیناں (نسرین گل)، شہربانو، انیلہ عابد تے رخسانہ حمید سرائیکی دے مشہور شاعر عزیز شاہد دے لخت جِگر فرخ عزیز (فرخو) دی فوتگی تے ڈکھ دی سانجھ کیتی اے۔ اے پی پی نال گالھ مہاڑ اچ انہاں آکھیا جونینگر پتر دا وچھوڑابہوں وڈا صدمہ اے جئیں عزیز شاہد دی چیل نِوا ڈتی اے،وڈا پتر ہوونڑ پاروں فرخو سئیں نال عزیز شاہد بہوں پیار کریندے ہَن، عزیز شاہد اپنڑی مشہور نظم کون تھی سگدے سانویں تیڈے وی لکھی ہئی، جیندے وچ او فرخو کوں مخاطب کریندے آکھیندن جو میڈی کنگھی وی شیشہ وی توں، میڈے شیشے دی تصویر توں. نینگر پتر دے وچھوڑے تے عزیز شاہد دے ڈکھ اچ سمورا وسیب شریک اے۔ رب سوہنڑا مرحوم کوں بہشت اچ جاہ تے عزیز شاہد تے سمورے ٹبر کوں صبرڈیوے.