اسلام آباد ۔ 21 ستمبر (اے پی پی) وزیر خارجہ شاہ محمود قریشی اسلام آباد اچ وفاقی وزیراں سینیٹر شبلی فراز، چوہدری فواد حسین اتے اسد عمردے کٹھے پریس کانفرنس اچ آکھیے جو اپوزیشن اپنڑی نامیدی دا اظہار کیتے ،جڈاں پورا جگ دہشتگردی دے خلاف پاک فوج دی تعریف کریندا کھڑے،انہاں اوندے تے ہی انگل چاتی اے جیندے تے بھارت اچ جشن منیندا پئے،بھل انہاں دی ہر سک دم تروڑ ویسی ۔انہاں آکھیا جو بڈدی معیشت کوں وزیراعظم عمران خان آن سنبھالیے،کرونا تے قابو پاتے، اپوزیشن کوں ایف اے ٹی ایف کیتے قانون سازی نال کوئی واسطہ کائنی،حکومت انہاں اتے پاکستان دے دشمناں دیاں سازشاں ناکام بنڑیندے اہم قانون سازی کیتی اے،نیب کوں مکا تے این آر او نئیں مل سگدا تہوں انہاں احتجاج احتجاج کھیڈنڑ دی راند وٹائی اے،حکومتی پالیسی پاروں افغانستان نال تعلقات چنگے تھین،جیندی وڈی مثال قطر مذاکرات ہین،اج ساں چین، امریکا سودھا بئے دوست ملکاں نال پہلے توں ودھ تعلقات تے مانڑ کریندے ہیں جیڑھا عمران خان دے ویژن دی کامیابی اے۔شاہ محمود قریشی آکھیے جو انہاں دے سارے اعتراض کوڑ دا پنڈھ ہین،مسلہ کشمیر تے پورا جگ الویندا پئے اتے اے پاکستان دی خارجہ پالیسی دی وجہ توں اے،وزیراعظم کشمیر تے ودے سفیر بنڑین،چین وی سی پیک تے مطمئن اے اتے ایندی مثال سی پیک دے فیز ٹو تے حکومت پاکستان نال معاہدہ اے ،سارے منصوبے ویلھے تے توڑ پجسن،ایں سانگے اپوزیشن ہر فورم تے ناکام تھیسی کیوں جو انہاں کوں ملک و قوم دا نئیں اپنڑے ڈیڈھ دا درد اے۔
