ملتان ۔ 11 ستمبر (اے پی پی)وزیر اعلیٰ سردار عثمان بزدار دے متوقع دورہ جنوبی پنجاب دے موقع تے مختلف اداریں تیاریاں شروع کرڈتن ،ایں سلسلے اچ ملتان ویسٹ منیجننٹ کمپنی شہر دیاں سڑکاں چمکاونڑ دا کم شروع کرڈتے تے صفائی کیتے ورکرز دے سپیشل سکواڈ تعینات کرڈتے گئن جڈاں جو کمپنی سیکنڈ شفٹ کوں وی سڑکاں دی صفائی دا ٹاسک ڈتے ۔ایندے نال ہی سڑکاں دے آسے پاسے کچرا تے ملبہ چاونڑ کیتے ہیوی مشینری سڈ گھدی گئی اے ۔گزریل ڈینھ صفائی دا جائزہ گھننڑ کیتے سی ای او ویسٹ منیجمنٹ کمپنی عبدالطیف خان مختلف ایریاز دا دورہ کیتا،منیجر آپریشنز داود مکی تے ڈپٹی منیجرز انوارالحق اتے عثمان خورشید وی انہاں دے رلے ہن ۔سی ای او ائرپورٹ روڈ،نشتر چوک اتے سیوڑا چوک، ہیڈ محمد والا روڈ،نادرن بائی پاس اتے ملتان پبلک سکول روڈ دا وی معائنہ کیتا انہاں نشتر ہسپتال،کاڑیالوجی انسٹی ٹیوٹ اتے چلڈرن ہسپتال دے آسے پاسے خصوصی صفائی دا حکم ڈتا ۔سی ای او سارے وڈے ہسپتالاں اتے سرکاری اداریں اچ چھڑکاﺅ دی ہدایت کیتی اے۔
