اسلام آباد ۔ 24 ستمبر (اے پی پی) وفاقی وزیر اطلاعات و نشریات سینیٹر شبلی فراز آکھیے جو وزیراعظم عمران خان دی ہدایت تے سیاسی وابستگی توں ہٹ تے پاکستان سیٹزن پورٹل، کامیاب جوان پروگرام جھیں اقدامات کامیابی نال جاری ہین جیڑھے معاشرے دے ہر طبقے کوں سہولیات ڈیندے پین،ہنڑ حکومت اتے عوام دے فاصلے مک گین ، شہری گھر بیٹھے اپنڑیاں شکایات درج کراسگدن جیڑھیاں وزیراعظم آفس توں متعلقہ اداریاں کوں بھیجاں ویندن۔اے گالھ انہاں اسلام آباد اچ وزیراعظم آفس اچ پاکستان سیٹزن پورٹل دی ہیلپ لائن دے اجراءدی تقریب نال خطاب کریندے آکھی۔ انہاں بٹن دبا تے پاکستان سیٹزن پورٹل دی ہیلپ لائن 051-9000111 دا افتتاح کیتا۔ایں موقع تے ہنڑ تئیں پورٹل اچ رجسٹرڈ تھیونڑ آلیاں دی تعداد، شکایات اتے ازالے بارے ڈسایا گیا۔ وفاقی وزیر اطلاعات و نشریات سینیٹر شبلی فراز ڈینھ رات محنت کرنڑ تے پاکستان سیٹزن پورٹل دی ٹیم کوں مبارک باد ڈیندے آکھیا جو وزیراعظم عمران خان عوام دیاں حکومتی اداریاں بارے شکایات ترجیجی بنیاداں تے حل کرنڑ چاہندن ،اے ہک بہترین فورم اے جو لوک بغیر کہیں ڈر دے شکایات کر سگن اتے انہاں دا تیکھے ازالہ تھیوے۔انہاں آکھیا جو پورٹل نال 29لکھ لوک منسلک ہین، 25لکھ شکایات وچوں 24لکھ شکایات دا ازالہ کیتا گئے اتے حل تھیونڑ آلیاں شکایات اچوں 5لکھ 66ہزارلوکاں توں فیڈ بیک گھدا گئے تاں سو فیصد لوکاں ایندے تے اطمینان کیتے۔انہاں آکھیے جو پاکستان سیٹزن پورٹل تے فنگر پرنٹس دے مسئلے،کہیں وی قسم دی معذوری سودھا ہر طبقے دی رسائی یقینی بنڑائی گئی اے ۔
