جنیوا۔15ستمبر(اے پی پی) عالمی ادارہ صحت ڈر ظاہر کیتے جو اکتوبر اتے نومبر وچ یورپ اچ کورونا وائرس دی وبا توں شدید متاثر تھیسی جڈاں جو ہلاکتاں وی ودھ سگدن ۔یورپ اچ عالمی ادارہ صحت دے ڈائریکٹر ہانس کلوگ فرانسیسی خبر رساں ادارے کوں ڈسائے جو بدقسمتی نال اکتوبر اتے نومبر یورپ دے کئی ملکاں کیتے چنگاں کائناں ہوسی ۔انہاں دے بقول کورونا وبا توں یورپ اچ ہلاکتاں ودھنڑ دا ڈر اے ۔ انہاں آکھیے جو حالی اے نی آکھیا ونج سگدا جو ویکسین آونڑ دے بعد حالات معمول تے آویسن ۔ انہاں آکھیے جو میں ہر ویلھے سنڑداں جو ویکسین آونڑ نال وبا مک ویسی اینویں ہرگز کائنی ۔ انہاں آکھیے جو اساں اے نئیں جانڑدے جو ویکسین ہر بندے کیتے ہکو سویں کارآمد تھیسی ۔ اساکوں اے گال دے اشارے ملدے پئن جو ویکسین کہیں گروہ کیتے مفید ہوسی تے ڈوجھیں کیتے کائناں۔ انہاں آکھیے اگر اساکوں ہک توں ودھ ویکسینز تے انحصار کرنڑاں پیا تاں انہاں دی ترسیل بہوں اوکھی تھی ویسی ۔انہاں آپنڑے پیغام وچ آکھیے جو عالمی وبا اوں ویلھے مک ویسی جڈاں اساں ایندے نال جیونڑ سکھ ویسوں ۔انہاں خبردار کیتے جو عالمی وبا دے خلاف سارے ملکاں دا ردعمل سائنسی اتے تحفظ صحت دے مطابق ہوونڑاں چاہیدے۔
