یو ایس اوپن ٹینس مینز سنگلز، عالمی نمبر ہک نوویک جوکووچ دا فاتحانہ آغاز

نیویارک ۔ یکم ستمبر (اے پی پی) سربیا دے بین الاقوامی شہرت یافتہ ٹینس سٹار اتے عالمی نمبر ہک نوویک جوکووچ اجوکے سال دے ڈوجھے گرینڈ سلام یو ایس اوپن ٹینس ٹورنامنٹ دا فاتحانہ آغاز کریندے ہوئیں ڈوجھے راﺅنڈ وچ پج گئن ،جڈاں جو میزبان جان اسنر ابتدائی راﺅنڈ اچ ہر تے میگا ایونٹ توں باہر تھی گئن ۔اجوکے سال دا ڈوجھا گرینڈ سلام یو ایس اوپن ٹینس ٹورنامنٹ امریکہ دے شہر نیویارک سٹی اچ شروع تھی گئے ۔ یو ایس ٹی اے بلی جین کنگ نیشنل ٹینس سینٹر اچ کھیڈےے ویندے پئن میگا ایونٹ دے مینز سنگلز دے ابتدائی راﺅنڈ اچ سربیا دے نامور ٹینس سٹار نوویک جوکووچ شاندار کارکردگی دا مظاہرہ کریندے ہوئیں بوسنیا دے حریف کھلاڑی دامیر کوں سٹریٹ سیٹس اچ 6-1، 6-4 اتے 6-1 توں ہرا تے نہ صرف میگا ایونٹ دا فاتحانہ آغاز کیتے بلکہ ڈوجھے راﺅنڈ کیتے کوالیفائی کرگھدے۔ یونانی کھلاڑی سٹیفانوس ہسپانوی حریف کھلاڑی البرٹ راموس کوں سٹریٹ سیٹس اچ 6-2، 6-1 اتے6-1 توں ہرا ڈتے ۔ پہلے راﺅنڈ دے بئے میچاں اچ سپین دے پابلو کیرینو، امریکہ دے سٹیو جان سن، کینیڈا دے ڈینس شاپووالو، بیلجیئم دے ڈیوڈ گوفن، امریکہ دے ٹیلر ہیری فریٹز اتے فرانس دے گیل سیمون کامیابی حاصل کرگھدی۔