اسلام آباد۔22اکتوبر (اے پی پی) وفاقی حکومت وزیراعلیٰ سندھ مراد علی شاہ ولوں ہک وفاقی وزیر دے ذریعے حکومت ختم کرݨ دی دھمکی دے الزام دی مذمت کریندیں ہوئیں سختی نال تردید کیتی اے،، وفاقی وزیر اطلاعات تے نشریات سینیٹر شبلی فراز اتے وزیراعظم دے مشیر احتساب تےداخلہ شہزاد اکبرسانجھی پریس کانفرنس اچ آکھیا جو سوچی سمجھی سازش دے تحت سندھ اچ ہک کھیڈ کھیݙیا ویندا پئے ڄئیں دا فائدہ اساݙے دشمن ملک ہندوستان کوں تھیندا پئے،اگر کوئی آئی جی سندھ دا اغوا تھیے تاں تعزیرات پاکستان دے تحت قابل جرم دفعہ دا مقدمہ درج کیوں نی کیتا ڳیا۔سندھ پولیس دے ٹویٹ دے مطابق ضابطے دے تحت مقدمہ درج اتے گرفتاری تھی اے۔ݙسیا ونجے جو سندھ پولیس ہک قابل ضمانت جرم اچ صفدر اعوان دی گرفتاری کیوں ضروری سمجھی،اے وی کُوڑ ماریا ڳئے جو بلاول وزیراعظم نال رابطہ نہ تھیوݨ تے آرمی چیف نال رابطہ کیتے،اساں ساریاں کوں پتہ اے جو تساں کوٹھے اندر کیا کریندو اتے کوٹھے توں بہرنکل کراہیں کینویں جمہوریت دے چیمپئن بݨ ویندو،سیاسی ٹھڳاں دی جماعت ن لیگ اآلیاں آپݨے دور اچ ماڈل ٹائون دی نہتی تریمتیں تے فائرنگ کیتی،بے نظیر دی تصویراں ہیلی کاپٹر توں سٹوایاں،ن لیگ ایجھی حرکتاں دی خالق اے۔اے لوک آپݨے تھوڑے فائدے،کرپشن دے مقدے اتے صحت دے ناں ٻھجے ہوئے آپݨے لیڈر کوں بچاوݨ سانگے جمہوریت اتے پاکستان کوں کمزور کرݨ چاہندن۔کوڑیاں دے آئی جی اتے سیاسی ٹھڳ سٹیج تے کھڑ کراہیں پاکستان دی عوام دا خون چوسݨ ،اداریاں کوں تباہ کرݨ،اداریاں دے ٹکراؤدی ناکام کوشش تے عوام توں معافی منگن۔نواز شریف ،الطاف حسین پارٹ ٹو دا کردار اداکریندے پئن۔انہاں آکھیا جو مزار قائد تے ہلڑ بازی اتے ڄیڑھا غیر قانونی واقعہ تھیے ایں اچ صفدر اتے مریم اعوان ڄیڑھا ڈرامہ کیتے او بانی پاکستان دے مزار تے طوفان بدتمیری دی بدترین مثال اے۔انہاں آکھیا جو پاکستان دی معیشت سدھے پاسے ٹر پئی اے،کورونا وائرس دی وبا دے چیلنج دے باوجود وزیراعظم عمران خان دی قیادت اچ اساݙی معیشت ولا آپݨے پیراں تے کھڑی تھی ڳئی اے۔ وزیراعظم دے مشیر برائے احتساب تے داخلہ بیرسٹر شہزاد اکبر آکھیا جو کوڑیاں دے آئی جی سندھ اسمبلی اتے پریس کانفرنس اچ کراچی دے واقعے تے وی کوڑ مارے۔انہاں آکھیا جو کڄھ ݙینھ پہلے مزار قائد تے ہلڑ بازی تھی اے۔ہک ماحول بݨایا ڳئے۔انہاں آکھیا جو اے سمڄھ نی امدی جو سندھ پولیس ہک قابل ضمانت جرم اچ کیوں گرفتار کیتا،اے کھیݙ کھیݙیا ڳئے۔انہاں آکھیا جو اے ݙسیا ونجے جو بلاول ہائوس اچ ایجھے کیڑھے اجلاس تھین جئیں دے بعد پولیس ولوں خط آوݨ شروع تھی گئن جو اساݙاجذبہ مُک ڳئے۔
