اسلام آباد۔22اکتوبر (اے پی پی) وزیر اعظم عمران خان دی صدارت وچ قومی رابطہ کمیٹی ہاوسنگ، تعمیرات و ڈویلپمنٹ دا ہفتہ وار اجلاس خمیس کوں منعقد تھیا ،اجلاس اچ گورنر سٹیٹ بینک غریب تے متوسط طبقے کیتے سوکھیاں شرطاں تے قرضہ ڈیوݨ دے حوالے نال بریفنگ ݙتی ۔نیشنل بینک، الائیڈ بینک، میزان بینک، بینک الحبیب، حبیب بینک اتے بینک آف پنجاب دے سربراہان وزیر اعظم کوں نواں پاکستان ہاؤسنگ پروگرام دے تحت قرضے ڈیوݨ بارے ݙسایا ۔اجلاس کوں ݙسایا ڳیا جو قرضے گھنݨ دے عمل کوں سوکھا بݨایا ڳے اتے ایں ضمن وچ برانچاں اچ انڄ ڈیسک بݨائے ڳن پرائیویٹ بینکس، اسلامی اتے روایتی بینکاری ݙوہیں دے تحت قرضے ݙیسن ۔بینکاں دے سربراہان حکومت کوں تعمیرات سیکٹر دے ودھارے تےغریب طبقے کوں اپݨا گھر بݨاوݨ دی سہولت ݙیوݨ دا یقین ݙیوایا ۔ انہاں وزیر اعظم اتے حکومتی معاشی ٹیم کوں کرونا وبا پاروں کاروباری طبقے بشمول بینکاں دے کیتے ڳے اقدامات تے خراج تحسین پیش کیتا ۔اجلاس کوں ݙسایا ڳیا جو قرضے ݙیوݨ دے عمل کوں گھٹ مدت بݨاوݨ کیتے ٹیکنالوجی دا استعمال کیتا ویندا پے تاں جو قرضہ گھنݨ آلے لوکاں دے کوائف دی تصدیق وختی تھی سڳے ۔وزیراعظم تاکید کیتی جو غریب لوکاں کوں بینکاں توں قرضے گھنݨ ویلھے سوکھ ݙتی ونڄے خاص طور تے انہاں دی عزت نفس دا خیال رکھیا ونڄے ۔چیف سیکرٹری پنجاب اجلاس کوں ݙسائے جو تعمیرات اتے بلڈرز کیتے آن لائن پورٹل دا اجرا کرݙتا ڳے جیں تے ہݨ تئیں 6994 درخواستاں ملیاں انہاں وچوں 54فیصد دی منظوری ݙے ݙتی ڳی اے۔وزیراعظم آکھیا جو سارے صوبے آن لائن پورٹل دا استعمال کرن تاں جو منظوری دے عمل کوں پورے طور تے شفاف تے وختی ممکن بݨایا ونڄ سڳے ۔
