اسلام آباد۔14نومبر(اے پی پی) سرائیکی عوامی تریمت تحریک پاکستان دی رہبر ادی عابدہ بتول،ادی کرن لاشاری،ادی ساجدہ پروین،  ادی سعدیہ شکیل، ادی نِیناں، اصفہ ملک، ادی رخسانہ، ادی میمونہ زبیر دھریجہ، ادی زینب جہانگیر، ادی انیلہ،ادی رابعہ تےادی شیر بانو عظیم سرائیکی قوم پرست، شاعر تے ادیب صوفی تاج محمد خان گوپانگ دی وفات تے ݙکھی  تے اُنہاں دے ٻالاں نال مکاݨی ہن. رہبر عابدہ بتول مرحوم صوفی تاج گوپانگ دی اݨ کھٹ سیاسی تے ادبی خدمات تے اُنہاں کوں خراج عقیدت پیش کریندیں آکھیا جو صوفی تاج گوپانگ دا وچھوڑا سمورے وسیب، سرائیکی قوم،  سرائیکی تحریک تے ادب دا ٻہوں وݙا زیان اے، قوم سانگے مرحوم دیں اݨ کھٹ خدمات کوں ہمیشہ یاد رکھیا ویسی. عابدہ بتول آکھیا جو تریمت تحریک مرحوم دے مشن کوں پورا کرݨ کیتے جدوجہد کریسی تے سرائیکی تحریک دی اڳونہی سانگے ٻاݨ مریسی، مرحوم دی سیاسی،  ادبی تے سماجی خدمات کوں ہمیشہ یاد رکھیا ویسی.  کرن لاشاری، سعدیہ شکیل تے ادی نِیناں آکھیا صوفی تاج گوپانگ سموری حیاتی مظلوم سرائیکی قوم دے حق حقوق دی جنگ لڑدے ریہن تے سرائیکی ادب کیتے اُنہاں دی جدوجہد مثالی اے، صوفی تاج گوپانگ دیاں قوم سانگے خدمات نوٌیں نسل کیتے سوجھل راہ ہن،  اللہ تعالیٰ مرحوم دی مغفرت فرماوے تے ٻالاں کوں صبر ݙیوے. آمین