اسلام آباد۔16نومبر (اے پی پی سرائیکی نیوزسروس )پاکستان سرائیکی پارٹی دے سابق نائب صدر و چیف آرگنائزر و سرائیکی دانشور اتے بیرسٹر تاج محمد خاں لنگاہ دے تحریکی ساتھی صوفی تاج خاں گوپانگ ایڈووکیٹ دی رسم قل خوانی گزریل ݙینھ فاضل پور اچ ادا کرݙتی ڳئی اے ۔ قل خوانی دی تقریب اچ پاکستان سرائیکی پارٹی دے مرکزی صدر ملک اللہ نواز وینس، سردار منظور خاں دریشک ایڈووکیٹ، سردار اختر خاں گوپانگ ایڈووکیٹ، راؤف خاں لنڈ ایڈووکیٹ، ملک جاوید چنڑ ایڈووکیٹ سیکرٹری اطلاعات پی ایس پی، سردار شیر علی مشہوری، شاہد خاں جتوئی، ملک اطہر ماڑھ، کوڑوں خاں گوپانگ سمیت ضلع راجن پور دے وکلاء برادری سودھے سابق ارکان اسمبلی و معززین علاقہ شرکت کیتی۔ایں موقع تے سرائیکی شعراء کرام صوفی تاج خاں گوپانگ دی شخصیت اتے سرائیکی قومی حقوق دے حوالے نال خدمات تے زبردست خراج تحسین پیش کیتا اتے علماء کرام صوفی تاج خاں گوپانگ دے اچے درجے کیتے دعا کرائی ۔ پاکستان سرائیکی پارٹی دے مرکزی صدر ملک اللہ نواز وینس آکھیے جو صوفی تاج خاں گوپانگ دی پاکستان سرائیکی پارٹی اتے سرائیکی قوم کیتے ودھ ساری خدمات ہن۔انھاں سرائیکی زبان و ادب دی خدمت کیتی او بیرسٹر تاج محمد خاں لنگاہ دے بااعتماد ساتھی ہن تے ہمیشہ سرائیکی حقوق دے حوالے نال پورے پاکستان اچ سرائیکی کاز دی خاطر سفر کیتا۔سردار منظور خاں دریشک اتے ملک جاوید چنڑ ایڈووکیٹ آکھیے جو سرائیکی حقوق دی خاطر صوفی تاج خاں گوپانگ دی جدوجہد کوں کݙہیں بھلایا نی ونڄ سڳدا انہاں اپݨے علم اتے تجربے دی بنیاد تے سرائیکی عوام دی رہنمائی کیتی۔پارٹی دے مرکزی صدر ملک اللہ نواز وینس اتے ٻئے پارٹی کارکنان صوفی تاج خاں گوپانگ دے صاحبزادے سبطین خاں گوپانگ کوں پڳ بدھوائی تے انہاں کوں سرائیکی اجرک پوائی ۔ بعداچ  صوفی تاج خاں گوپانگ دی قبر تے حاضری ݙتی تے فاتحہ خوانی کیتی ڳئی ۔صوفی تاج خاں گوپانگ کوں انہاں دی وصیت موجب انھاں کوں فاضل پور شہر اتے پاکستان سرائیکی پارٹی دے جھنڈے وچ دفن کیتا ڳئے۔