سلام آباد۔24نومبر(اے پی پی)وزیر اطلاعات و نشریات سینیٹر شبلی فراز آکھیے جو کابینہ ریپ دے واقعات روکݨ کیتے قوانین کوں موثر بݨاوݨ اتے ملزمان کیتے سخت سزاواں دی سفارشاں دی منظوری ݙے ݙتی اے۔ اسلام آباد اچ وفاقی وزرا حماد اظہر اتے مخدوم خسرو بختیار دے کٹھے کابینہ بارے میڈیا بریفنگ اچ شبلی فراز آکھیا جو وفاقی کابینہ دا اجلاس وزیراعظم عمران خان دی اڳواݨی اچ تھئے جئیں ملک اچ تریمتیں نال ریپ دے واقعات دی لھر کھنݙݨ تے وزیراعظم عمران خان دی ہدایت تے وفاقی کابینہ ریپ دے واقعات روکݨ سانڳے اقدامات اتے خاص کر ایں بارے قوانین کوں موثر بݨاوݨ تے غور کیتے،ریپ اتے گینگ ریپ ملزمان کوں اکثر رہائی مل ویندی اے بھل وزیر اعظم ایں بارے سخت قانون دا اطلاق یقینی بݨاوݨ دی ہدایت کیتی اے اتے  ریپ دے ملزمان دے خلاف قانون دا مسودہ وی تیکھے مکمل کرڳھدا ویسی۔ وفاقی وزیر حماد اظہر آکھیا جو چینی مافیا دی حوصلہ شکنی کیتے قانون سازی کیتی ویسی جیندے اچ پنجھا ہزار دی بجائے 50 لکھ روپے روزانہ جرمانہ رکھیا ویسی، ہݨ تئیں سوا لکھ ٹن کھنݙ درآمد کیتی ڳئی اے، ملک دے وݙےے شعبہ زراعت اچ اصلاحات دی لوڑھ اے، ایں ویلھے ‘شوگر ریفارم کمیٹی’ وی اپݨا کم کریندی پئی اے، کھنݙ دے ایکس مل ریٹ اتے ہول سیل ریٹ ملھ اچ ݙاہ ڈینھ اچ 10 توں 12 روپے فی کلو کمی آئی اے، یوٹیلیٹی اسٹورز تے کھنݙ 68 روپے کلو ملدی پئی اے، امید اے کجھ ݙینھ اچ کھنݙ دا ملھ ٻیا وی ڳھٹسی۔ انہاں آکھیا جو جنوبی پنجاب دیاں شوگر ملز مکمل گنجائش تے پڄ ڳین ڄݙاں جو پنجاب اچ 10 نومبر توں ڳنے دی کرشنگ شروع تھیسی۔ بریفنگ اچ  مخدوم خسرو بختیار آکھیا جو 22 لکھ ٹن کݨک دی کمی درآمد نال پوری کیتی ویسی، تہوں قیمتاں وی ڳھٹݨ لڳ ڳین، اتے نومبر دے چھیکڑی ہفتے اچ 2 لکھ 95 ہزار میٹرک ٹن کݨک درآمد کیتی ویسی، دسمبر اچ 4 لکھ 45 ہزار میٹرک ٹن، جنوری اچ 4 لکھ 55 ہزار میٹرک ٹن اتے فروری اچ 3 لکھ 90 ہزار میٹرک ٹن اتے مارچ اچ ہک لکھ 65 ہزار میٹرک ٹن کݨک درآمد کیتی ویسی، کڄھ ݙینھ اچ اٹے دا مصنوعی بحران مک ویسی۔