اقوام متحدہ ۔3نومبر (اے پی پی) اقوام متحدہ دے سیکرٹری جنرل انتونیو گوترس صحافیاں دے خلاف جرائم روکݨ دے عالمی ݙینھ دے موقع تے صحافیاں کوں تحفظ ݙیوݨ دی اپیل کیتی اے ۔ایں موقع تے انتونیو گوترس اپݨے پیغام وچ آکھیے جو جݙاں صحافیاں کوں نشانہ بݨایا ویندے تاں معاشرے کوں ایندی قیمت ادا کرݨٰی پوندی اے ۔ اگر اساں صحافیاں دا تحفظ نی کریندے تاں معلومات گھنݨ تے ثبوت تے مبنی فیصلے کرݨ دی اساݙی صلاحیت اچ ٻہوں رکاوٹ پیدا تھیندی اے ۔انہاں آکھیے جو کرونا وائرس دی وبا صحافیاں تے میڈیا دے لوکاں کیتے نویں پریشانی پیدا کرݙتی اے کیوں جو انہاں دی جسمانی سلامتی تے حملیں دی تعداد اچ ودھارا تھے۔ انہاں آکھیے جو اڄوکے سال دے پہلے چھی مہینے وچ صحافیاں تے حملیں دے گھٹ توں گھٹ 21واقعات تھی چکن جیرھے جو 2017اچ صحافیاں تے کل حملیں دے مترادف ہن ۔ انہاں آکھیے جو صحافیاں دے کم اچ ودھیک رکاوٹاں ہن جیں اچ استغاثہ دیاں تڑیاں، گرفتاری ، قید ، صحافتی رسائی توں انکار، صحافیاں دے خلاف جرائم دی تحقیقات اتے انہاں دے خلاف قانونی چارہ جوئی شامل ھے۔
