اسلام آباد۔27نومبر(اے پی پی)وزیر اعظم عمران خان آکھیے جو ملکی ترقی و خوشحالی صنعتی شعبے اتے کاروباری طبقے دی ترقی نال جڑی ہوئی اے، فیصلہ سازی اچ صنعتکاراں دی تجاویز دے چنڳے نتیجے نکلدے پین، صنعتکاراں کوں برآمدات بارے اوکھ اتے مسلیاں کوں وی تیکھے حل کیتا ویسی، اے ڳالھ انہاں صنعتکاراں دے وفد نال الویندے آکھی۔ وفد اچ اعظم فاروق (چراٹ سیمنٹ)، بشیر علی محمد (گل احمد)، محمد علی تابہ (لکی سیمنٹ)، ثاقب شیرازی (ہنڈا اٹلس) فواد مختار (فاطمہ فرٹیلایزر)، عارف حبیب (عارف حبیب گروپ لمیٹڈ) اتے حسین داؤد (اینگرو کارپوریشن) شامل ہن۔ملاقات اچ وفاقی وزیر محمدحماد اظہر، مشیرانِ وزیر اعظم عبدالرزاق داؤد، ڈاکٹر عبدالحفیظ شیخ اتے ڈاکٹر عشرت حسین دے علاوہ اعلیٰ سرکاری حکام وی موجود ہن۔ وفد کاروباری برادری کیتے سہولیات اتے مراعات سانڳے وزیراعظم دے کردار دی تعریف کیتی اتے فارن ایکسچینج ریزرو ودھݨ تے حکومتی معاشی ٹیم کوں وی سراہیا۔ وفد وزیر اعظم کوں اپݨے مسائل ڈسائے اتے مختلف تجاویز وی ݙتن۔ وفد کرونا وبا دے باوجود ملکی کاروباری سرگرمیاں، اقتصادی ودھوتری اتے روزگار سانڳے ودھ تعاون دا یقین ݙیوایا۔ وزیر اعظم آکھیا جو حکومت صنعتاں اتے کاروباری سرگرمیاں دی ترقی کیتے سہولتاں ودھیسی۔ وزیر اعظم صنعتکاراں کوں ایکسپورٹس اچ پیش آوݨ آلیاں مشکلات تیھکے حل کرݨ دی ہدایت کیتی اتے صنعتکاراں توں زراعت دے شعبے اچ جدت اتے مختلف فصلاں دی پیداواری صلاحیت ودھاوݨ کیتے وݙے پیمانے تے کارپوریٹ فارمنگ شروع کرں دیاں تجویزاں وی منگین۔
