لکھت:ڈاکٹر سعدیہ کمال
استاد برکت علی سکھر اچ ڄمیے اتے پلے ودھیے، انہاں دے والد استاد رسول بخش سندھ دے مشہور گلوکار ہن۔ اے پی پی سرائیکی نیوز سروس نال ڳالھ مہاڑ کریندیں ہوئیں استاد برکت علی ݙسائے جو انہاں آپݨے نکے لا توں ای آپݨے والد توں گاوݨ سکھݨ شروع کر ݙتا ہئی اتے بعد اچ پاکستان دے جڳ مشہور گلوکار استاد غلام علی خان توں شاگردی اچ آئے، استاد برکت علی ٻہوں مشہور گاوݨ گائن۔
استاد برکت علی ݙسائے جو پہلا کلام ریڈیو پاکستان خیر پور توں 1988وچ ڳایا ہئی اتے اوندی دھن وی میں خود بݨائی ہئی، اوندے بعد میں مشہور تھی ڳیا تے اوندے توں بعد میݙی دھن کوں فلم اچ کاپی کرتے ڳایا ڳیا “ہوسکے تو میرا ایک کام کرو”ایندے توں بعد ودھ ساریاں سندھی غزلاں ڳائیاں اتے میں بیدل فقیر جنھاں دی سکھر وچ درگاہ ھے انھاں دے کلام میں سرائیکی وچ ڳانداں تے حضرت سچل سرمست دا تے خواجہ غلام فرید دا وی سرائیکی وچ کلام ڳمداں، اتے سندھ وچ سندھی تے سرائیکی ݙوہیں کوں لوک سݨدن کیوں کہ میں غزلاں تے کافیاں ڳانداں ایں کیتے میں استاد غلام علی خان دی شاگردی ڳھدی ہم تے میݙے والد محترم میکوں انھاں دا شاگرد بݨوایا۔
کافیاں تے غزلاں کوں انہاں کیوں چݨیا ایں بارے انہاں ݙسیا جو میکوں بچپن توں ہی نیم کلاسکیل ، غزل تے عارفہ کلام ڳاوݨ دا شوق ہئی، تے میݙی ڳائیکی وچوں استاد غلام علی خان دی جھلک نظر آندی ھے۔ انہاں ݙسائے جو میں 35 سالیں اچ پاکستان توں علاوہ ٻاہرلے ملکیں جئیں اچ دبئی ، ہانگ کانگ ، بینکاک،لندن اچ میکوں آپݨی کارکردگی ݙکھاوݨ دا موقع ملیے ۔ انہاں صوفیہ کلام ڳائے جئیں دے اچ حضرت شاہ عبدالطیف بھٹائی دا کلام جئیں دے اچ سر بارے انہاں ڈسیا جو انھاں دے سُر “راݨو” سر کوہیاری”سر تلنگ”ایندے وچ ٻہوں سارے کلام ہن اساں ہرجاہ پییش کریندے رہ ویندوں۔انہاں سرائیکی شاعری دا امام حضرت خواجہ غلام فرید کوں وی انہاں ڳائے۔
روندیں عمر نبھائی، یار دی خبر نہ کائی
اردو اتے ٻئی زباناں دی موسیقی بارے استاد برکت علی دی رائے اے جو سرائیکی تے سندھی دا مستقبل ٻہوں روشن اے کیونجو انہاں دی تاریخ پراݨی اے ۔ استاد برکت علی اے پی پی نال ڳالھ کریندیں ہوئیں ارداس کیتی جو جیڑھے اصل فنکار اتے گلوکار صلاحیت اتے قابلیت رکھیندن انہاں کوں اڳوں تے آندا ونڄے، اتے ایں شعبے اچ گروپ بازی کرݨ آلے لوکاں دی حوصلہ افزائی نہ کیتی ونجے۔ اگر قابل لوکاں کوں کم کرݨ ݙتا ونڄے تاں اصل فن لوکاں سامݨے آسی اتے ایں شعبے سانڳے بہوں چنڳا ہوسی۔ چھیکڑ اچ انہاں حکومت کوں تجویز ݙتی جو فنکار پہلے ای مسئلیاں دا شکار ہن اتے ہݨ کورونا پاروں انہاں دی اوکھ ودھ ڳئی اے، انہاں دی کارکردگی کوں بہتر کرݨ سانڳے حکومت انہاں نال مالی تعاون کرے۔
