اسلام آباد۔21دسمبر (اے پی پی):اسسٹنٹ کمشنر جام پور فاروق احمد ملک آکھیے جو جامپور دا ماڈل بازار ڈیرہ غازیخان ڈویثرن دامثالی بازار اے۔ جتھاں صارفین کوں روزانہ دے استعمال دیاں چیزاں ہکی چھت تلے مناسب تے کنٹرول ریٹ تے ملدین ۔اے ڳالھ انھاں ماڈل بازار جام پور اچ مزید دوکاناں اتے فوڈ سٹریٹ دے توسیع منصوبہ دے افتتاح دے موقع تے میڈیا نال ڳالھ مھاڑ کریندے ہوئیں آکھی اے ۔انھاں آکھیے جو ہر سال رمضان بازار دا انعقاد وی اتھاؤں تھیندے تے موجودہ حکومت دی ہدایات دی روشنی اچ سہولت بازار وی قائم کیتا ڳئے ۔ یوٹیلٹی سٹورز وی اتھاں موجود اے ۔انھاں بازار اچ سیکیورٹی انتظامات اتے حکومت ولوں جاری کیتے ڳے ایس او پیز تے عمل درآمد کوں یقینی بݨاوݨ کیتے اقدامات دا جائزہ ڳھدا ۔ایں موقع تے بریفنگ وچ ݙسایا ڳیا جو ماڈل بازار جام پور اچ ایں ڳیلھے 135 دوکاناں موجود ہن ۔ دوکانداراں دی ڈیمانڈ دے پیش نظر مزید 61 دوکاناں تعمیر کیتیاں ویندیاں پن ۔
