ملتان ۔24جنوری  (اے پی پی):وزیرخارجہ شاہ محمود قریشی آکھیے جو میں نویں امریکی انتظامیہ کوں افغانستان امن عمل دے حوالے نال خط لکھئن ،امریکی صدرجوبائیڈن اپݨی سمت دا تعین کرڳھدے ۔افغان مسئلے تے پاکستان اتے نویں امریکی انتظامیہ دی سوچ اچ مطابقت اے اساں وی اتھاں امن تے استحکام چاہندوں ،دہشت گردی داخاتمہ چاہندوں تے افغانستان اچ جمہوری عمل کوں مستحکم ݙیکھݨ چاہندوں امریکی انتظامیہ دی وی ایہا سوچ اے ۔ملتان اچ میڈیا نال ڳالھ مہاڑ کریندے ہوئیں وزیرخارجہ شاہ محمودقریشی آکھیے جو امریکا اچ ڈیموکریٹس کوں چار سال بعد ول برسراقتدارآوݨ تے تبدیل شدہ دنیا ملی اے ،ڈیموکریٹس اڄ توں چار سال پہلے حکومت چھوڑ تے ڳئے ہن ہݨ او ول برسر اقتدار آئے ہن انہاں چار سالاں اچ دنیا، خطہ اتے پاکستان بدل ڳئے تے ایں بدلیے ہوئے پاکستان نال انہاں کوں رابطہ کرݨاں اے ۔ انہاں مزید آکھیے جو انہاں 4 سالاں اچ بھارت وی بدل ڳے او اڄ او سیکیولربھارت دکھائی نی ݙیندا پیا بلکہ اڄ تاں بھارت دے اندر توں آوازاں چودیاں پئن اے او سیکولر انڈیا کائنی بلکہ ہندو توا دی نویں شکل، آر ایس ایس دی سوچ دا نواں عملی مظاہرہ نظرآندا پئے ۔ انہاں آکھیے جو انہاں نویں اصولاں تے، ہک نواں پاکستان، ہک نویں سوچ اتے نویں ترجیحات دے نال اساں انہاں نال رابطہ کریسوں۔