جنوبی افریقہ دی ٹیم پاکستان دے خلاف پہلے ٹیسٹ اچ پہلے کھیݙدے ہوئے صرف 220 تے آل آوٹ تھی ڳئی ڄݙاں جو ولدے اچ پاکستان دے پہلے چار کھلاڑی وی نئیں ڄم سڳیے اتے صرف 18 اووراں اچ پہلے ݙینھ دا کھیݙ مکݨ تئیں چار بلے باز پویلئن پڄ ڳین۔ پہلا میچ کھیݙݨ آلے اوپنرعمران بٹ 9، عابد علی 4،کپتان بابر اعظم 7 اتے ناعٹ واچ مین شاہین شاہ افریدی کوئی رن ودھائے بغیر اوٹ تھین۔ ایں ویلھے کریز تے اظہر علی اتے فواد عالم پنڄ پنڄ رنز بݨا تے موجود ہین جیڑھے سویلے ولا کھیݙ اتھاو شروع کریسن۔ جنوبی افریقہ ولوں کیگیسو ربادا 2 ڄݙاں جو اینرک اتے مہاراج ہک ہک وکٹ ڳھدی اے اتے پاکستان کوں مہمان ٹیم تے 187 رن دی وتھی اے۔ ایں توں پہلے جنوبی افریقہ ٹاس جیت تے پہلے بیٹنگ دا فیصلہ کیتے جیڑھا چنڳاں نئیں نکلیا اتے پوری مہان ٹیم صرف 220 رن بݨا سڳی۔ کراچی ٹیسٹ دے پہلے ݙینھ جنوبی افریقہ دی ساری ٹیم 220 رنز بݨا تے آوٹ‌ تھی گئی۔ 30 دے مجموعے تے مارکرم شاہین شاہ آفریدی دا شکار بݨین، انہاں دا عمران بٹ شاندار کیچ کیتے۔ ریسی وینڈر 17، ڈپلیسی 23، الگر 58 رنز ڄذاں جو ڈی کوک 15 رنز بݨا تے آؤٹ تھئے۔ جنوبی افریقہ دی 6ویں وکٹ 179 رنز تے ݙھے ڳئی تے ٹمبا باوما، حسن علی دی تھرو تے محمد رضوان دے ہتھوں رن آوٹ تھئے۔ جارج لنڈے 35 رنز ٻݨائے بھل کیشاو مہاراج اتے انرچ نورتجے صفر تے آوٹ تھئے۔ کیگسو ربادا  21 رنز، لنگی نگیدی 8 رنز تے شاہین شاہ آفریدی دی گیند تے ایل بی ڈبلیو تھی ڳئے۔ پاکستانی باولرز چنڳی کارکردگی ݙکھیندے ہوئیں حریف بلے بازاں کوں کریز تے ٹکݨ نہ ݙتا، یاسرشاہ 3، شاہین آفریدی اتے نعمان 2،2 وکٹاں ڳھدن۔