اسلام آباد۔14جنوری (اے پی پی) حکومت واضح کیتے جو اپوزیشن بے شک احتجاج کرے پر قانون کوں ہتھ اچ ڳھنݨ دی موکل کائنا ݙیسوں۔ افراتفری کھنڈاوݨ سانڳے کھیݙ نہ کھݙیا ونڄے۔ عمران خان کݙاہیں اسرائیل کوں کائنا منیسی۔ مدرسیاں دے طلباء کوں بھڑکاوݨ سانڳے اشتعال انگیز نعرے نہ لاتے ونجن۔ اڄوکے الیکشن کمیشن الیکشن کرائے ای کائنی تاں احتجاج دا کیا جواز اے۔مولانا فضل الرحمن اسلام آباد آلے پاسے نی اسلام آلے پاسے ݙیکھن۔ اے ڳالھیں وفاقی وزراء خمیس کوں پریس کانفرنس نال خطاب کریندیں ہوئیں آکھی۔ وفاقی وزیر داخلہ شیخ رشید احمد آکھیا جو وزراء دے اجلاس اچ امن و امان دی صورتحال دا جائزہ ڳھدا ڳے۔ وفاقی وزیر سائنس اینڈ ٹیکنالوجی فواد چوہدری آکھیا جو الیکشن کمیشن مسلم لیگ (ن) اتے پیپلز پارٹی دے مشورے نال ای بݨایا ڳیا ہئی۔ گزریل الیکشن اچ الیکشن کمیشن نی کرائے ایں دے خلاف احتجاج دا کوئی جواز کائنی۔ وفاقی وزیر اطلاعات و نشریات سینیٹر شبلی فرازآکھیا جو مسلم لیگ ن اتے پیپلز پارٹی توں درخواست اے جو او احتجاج د ے نال نال الیکشن اچ دھاندلی دے ثبوت، فارن فنڈنگ بارے الیکشن کمیشن اچ پارٹی اکائونٹس دی تفصیل اتے دستاویزات وی نال ڳھن تے آون کیونجو الیکشن کمیشن دی سکروٹنی کمیٹی انہاں توں کئی واری پارٹی اکائونٹس دی تفصیل منڳی اے۔ او خمیس کوں وزارت داخلہ اچ وفاقی وزیر شیخ رشید احمد ‘ پرویز خٹک ‘ بیرسٹرفروغ نسیم ‘فواد چوہدری دے رلے پریس کانفرنس نال خطاب کریندے پئے ہن۔ انہاں آکھیا جو پاکستان تحریک انصاف ولوں دائر فارن فنڈنگ کیس اچ مسلم لیگ ن اتے پیپلز پارٹی آپݨے اکائونٹس دی تفصیلم فارن فنڈنگ بارے دستاویزات الیکشن کمیشن اچ پیش کرن۔
